प्रतिनिधिसभाको बैठक भिजिट भिसा प्रकरणका कारण स्थगित गरिएको छ। मङ्गलबार बिहान ११ बजे सुरु भएको बैठकमा विपक्षी दलहरूले तीव्र आपत्ति जनाएपछि दिउँसो साढे दुई बजेसम्मका लागि स्थगन गरिएको थियो। अब सो बैठक बुधबार बिहान ११ बजे पुनः बस्ने तय भएको छ।
विपक्षी दलहरूले भिजिट भिसा सम्बन्धी घटनामा गम्भीरता देखाउँदै उच्चस्तरीय छानबिन समिति गठन नहुँदासम्म सदन नचल्न दिने अडान लिएका छन्। बैठक सुरु हुनासाथ विपक्षी सांसदहरू विरोधमा उभिए। त्यसक्रममा प्रमुख प्रतिपक्षी दल नेकपा (माओवादी केन्द्र) का सांसद वर्षमान पुन र राष्ट्रिय स्वतन्त्र पार्टीका सांसद शिशिर खनालले स्पष्ट रूपमा छानबिन आयोग नबन्दासम्म संसद अवरुद्ध हुने चेतावनी दिएका थिए।