बीवाईडीको गाडी गुड्दागुड्दै बीच सडकमा ब्रेक लागेपछिको त्यो भयानक दुर्घटना

नेपालमा पछिल्ला वर्षहरूमा इलेक्ट्रिक गाडी (EV) को प्रयोग तीव्र गतिमा बढिरहेको छ। काठमाडौंका गल्लीदेखि राजमार्गसम्म अब पेट्रोल–डिजेलका गाडीभन्दा EV बढी देखिन थालेका छन्। खर्च कम र प्रदूषणमुक्त भनी प्रचार गरिएका यी गाडीहरू भविष्यका समाधान भनेर प्रस्तुत गरिएका छन्। तर, चम्किलो भविष्यका कुरा बीच, केही गम्भीर त्रुटिहरू सतहमा आउन थालेका छन्।

चिनियाँ अटोमोबाइल निर्माता BYD को लोकप्रिय इलेक्ट्रिक अट्टाे ३ (Atto 3) हाल सुरक्षासम्बन्धी विवादको केन्द्रमा छ। यसको अटोमेटिक आपतकालीन ब्रेकिङ (Automatic Emergency Braking – AEB) प्रणालीमा देखिएको त्रुटिले विश्वभर ग्राहकलाई त्रसित बनाएको छ।

मलेसियाको डरलाग्दो घटना

गत मे १ मा मलेसियाका एक अट्टाे ३ (Atto 3) मालिक आफ्नो परिवारसहित मेलाकाबाट पेनाङ जाँदै थिए। यात्राका क्रममा, चेरास-काजाङ एक्सप्रेसवेको द्रुत लेनमा अचानक गाडीले चेतावनीबिना आपतकालीन ब्रेक लगायाे र भयानक दुर्घटना भयो ।

गाडी रोकिँदा स्क्रिनमा पावर सिस्टम फेलियर (Power System Failure) भन्ने सन्देश देखियो। समस्या यत्तिमै सीमित रहेन — गाडी न्युट्रल (Neutral) मोडमा राख्दा पनि पाङ्ग्रा जाम भएर नचल्ने अवस्था भयो । करिब एक घण्टापछि आएको टोइङ सेवाले पनि गाडीलाई सजिलै ट्रकमा चढाउन सकेन, ‘व्हील डली’ राखेर मात्र गाडी सारियो । उक्त घटनाबारे गाडीको मालिकले फेसबुकमा लेखे, ‘गाडी अचानक रोकिने बित्तिकै पछाडिबाट तीव्र गतिमा आएका गाडीहरू ठोक्किनबाट ज्यान जोगिएको क्षण निकै डरलाग्दो थियो ।’

‘फेन्टम ब्रेकिङ’ : विश्वव्यापी समस्या

यस्ता घटना मलेसियामात्र सीमित छैनन्। अष्ट्रेलिया, युरोप र अन्य एसियाली देशका अट्टाे ३ (Atto 3) मालिकहरूले पनि “फेन्टम ब्रेकिङ” अर्थात् कुनै अवरोध नभएको अवस्थामा पनि गाडी आफैं रोकिने समस्या बारम्बार अनुभव गरेको बताएका छन्। कतिपय अवस्थामा पुलमुनिबाट गुड्दा, सडकमा छायाँ परेमा वा कहिलेकाहीँ खाली सडकमै पनि यस्तो त्रुटि देखिएको उनीहरुकाे गुनासाे छ।

विज्ञहरूका अनुसार, यो समस्या एईबी (AEB) प्रणालीमा प्रयोग भएको सेन्सर वा सफ्टवेयर त्रुटिका कारण उत्पन्न भएको हो। यसले उच्च वेगमा यात्रा गर्ने क्रममा घातक दुर्घटनासम्म निम्त्याउन सक्छ।

नेपालमा पनि चिन्ता

मलेसिया, अष्ट्रेलिया र युरोपमा देखिएको फेन्टम ब्रेकिङ समस्या नेपालमा पनि उपभोक्तालाई चिन्तित बनाइरहेको छ । विदेशमा भएका घटनाले अट्टाे ३ (Atto 3) को अटोमेटिक आपतकालीन ब्रेकिङ (AEB) प्रणाली सुरक्षित नभएको आशंका बलियो बनाएको छ ।

अझ नेपालका साँघुरा सडक, अनियमित ट्राफिक र असुरक्षित लेनमा यदि अचानक गाडी आफैं रोकिने अवस्था सिर्जना भयो भने दुर्घटनाको जोखिम झन् उच्च हुन्छ । नेपाल ‘ईभी–मय’ हुँदैछ भन्ने प्रचारबीच, बीवाईडी अट्टाे ३ (BYD Atto 3)मा देखिएको त्रुटिले अब उपभोक्ताको विश्वासमा ठूलो प्रश्नचिन्ह खडा गरेको छ ।

© 2025 All right reserved Site By : Himal Creation || सूचना विभाग दर्ता नं : ४१२१–२०८०/२०८१