काठमाडौं । नेपाल विद्यार्थी संघका केन्द्रीय सदस्यहरूले २३ र २४ गतेका आन्दोलनमा सहादत प्राप्त विद्यार्थीहरूलाई श्रद्धाञ्जली अर्पण गर्दै र संविधानको सुरक्षाको माग गर्दै काठमाडौंका विभिन्न स्थानमा सांकेतिक विरोध प्रदर्शन गरेका छन्।
उक्त विरोधका क्रममा उनीहरूले संसद भवनको पर्खालमा कलर स्प्रेमार्फत ‘संविधान बचाऔं’ र ‘विद्यार्थी सहिदहरूको वीर सम्झना’ जस्ता सन्देश लेखेका छन्। विभिन्न चुनौतिहरुको सामना गरेर संसद भवनजस्तो उच्च सुरक्षा क्षेत्रभित्र पुगेर सन्देश लेखेको उनीहरुले बताए।
साथै, उनीहरूले असनको आकाशे पुल, त्रिचन्द्र क्याम्पसको अगाडिको भित्ताहरू लगायत काठमाडौंका अन्य विभिन्न ठाउँहरुमा पनि यस्तै सन्देशहरू लेखेका छन् ।
नेपाल विद्यार्थी संघका अनुसार, यो अभियानको उद्देश्य संविधानमाथि भइरहेका सम्भावित खतराहरूविरुद्ध आवाज उठाउने र विगतमा संविधान र प्रजातन्त्रको रक्षाका लागि ज्यान आहुति दिने विद्यार्थी सहिदहरूको स्मरण गर्नु रहेको उनीहरुले बताए ।
संघका केन्द्रीय सदस्यहरू भन्छन्, ‘जेन जि पुस्ताका साथीहरू, तपाईंहरू भन्दा अघिल्लो पुस्ताले जुन संघर्ष गरेर यो संविधान ल्याए, अब यसको रक्षा तपाईंहरूको कर्तव्य हो। पछिल्लो पुस्ताले पनि संविधानको मूल्य र मर्म बुझ्न सकून् भन्ने उद्देश्यले हामीले यी सन्देशहरू सार्वजनिक स्थानमा लेखेका हौं।’
यसअघि बिहीबार पनि नेपाल विद्यार्थी संघ सडकमै आएर संविधानको रक्षा गर्नुपर्ने माग गर्दै प्रदर्शन गरेको थियो। तर त्यस क्रममा जेन जी युवाहरूले उनीहरूलाई लखेटेका थिए ।
