काठमाडाैं । नेकपा माओवादी केन्द्रका पोलिटव्यूरो सदस्य एवम सुर्खेत जिल्ला इन्चार्ज झकबहादुर मल्ल ‘सुदिप’ ले मंसिर ४ को निर्वाचनपछि आफनो पार्टीका अध्यक्ष पुष्पकमल दाहाल ‘प्रचण्ड’ प्रधानमन्त्री हुने दाबी गरेका छन् ।
हुलाक सञ्चारसँग कुरा गर्दै नेता मल्लले चुनावमा माओवादी सबैभन्दा ठूलो बाम पार्टी बन्ने र गठबन्धनको भावनाअनुसार प्रचण्ड प्रधानमन्त्री हुने बताए । प्रचण्ड पात्र मात्र नभइ बिचार र दृष्टिकोण भएकाले चुनावपछि प्रचण्डको नेतृत्वमा मुलुक अघि बढ्ने उनको भनाइ छ ।
गठबन्धन निर्माण, संविधानको रक्षा, संघीय गणतन्त्रको नेतृ्त्वकर्ताको हैसियतले प्रचण्ड प्रधानमन्त्री हुने कुरामा कुनै विवाद नभएको मल्ल बताउँछन् । उनका अनुसार यो कुरामा कांग्रेस र सभापति शेरबहादुर देउवा पनि सकारात्मक छन् ।
संविधान र परिवर्तनका उपलब्धीको रक्षार्थ गठवन्धन चुनावपछि पनि निरन्तर हुने मल्ल बताउँछन् ।
मल्ल भन्छन्, ‘जहाँसम्म बाम एकताको सन्दर्भ छ त्यसका लागि एमाले अध्यक्ष केपी शर्मा ओली बाधक रहेका छन् । ओलीको नेतृत्व नभएको शक्तिसहितका बाम घटकसँग बाम एकता गर्न कुनै समस्या छैन । ओलीको अहंकार, घमण्ड, दम्भ र शैलीका कारण वाम एकता सम्भव हुन सकेको छैन । ओली बिनाको एमाले सच्चिएर आउँछ भने वाम एकता गर्न माओवादी तयार छ । ’
मल्लका अनुसार राष्ट्रपति विद्या भण्डारी र एमाले अध्यक्ष ओली मंसिर ४ को चुनाव विथोल्न चाहन्छन् । उनीहरुले सरकार र गठबन्धनलाई उक्साउन जति हत्कन्डा गरेपनि गठवन्धन संयमित भएर अघि बढ्नेछ । चुनाव प्रभावित गर्न खोजिएका सबै प्रयास असफल हुनेछन् ।
सुर्खेत २ माओवादीको एकल सिफारिसमा परेका मल्लले सुर्खेतका दुई निर्वाचन क्षेत्र मध्ये एउटा माओवादीले पाउनुपर्ने दाबी स्वभाविक रहेको बताए । आफूले टिकट पाए सहजै जित हासिल गर्ने उनको विश्वास छ ।
विस्तृत भिडिओमा :
