काठमाडौं । राष्ट्रपति रामचन्द्र पौडेलले नेपालको संविधानले सङ्घीय लोकतान्त्रिक गणतन्त्र, नागरिक स्वतन्त्रता, मौलिक अधिकार, मानव अधिकार, स्वतन्त्र र निष्पक्ष न्यायपालिका, कानुनी राज्यको अवधारणा लगायतका लोकतान्त्रिक मूल्य र मान्यताप्रति प्रतिबद्ध प्रणालीको व्यवस्था गरेको बताउँदै यी मूल्यहरूको संरक्षण, प्रवर्द्धन र न्यायपूर्ण समाज निर्माणमा न्याय र कानुन जगतको महत्त्वपूर्ण भूमिका रहेको स्मरण गराएका छन्।
शुक्रबार कानुन दिवसको अवसरमा आयोजित एक कार्यक्रममा सम्बोधन गर्दै राष्ट्रपति पौडेलले यस क्षेत्रसँग आबद्ध सबैको दायित्वको बोध निरन्तर गराइने विश्वास व्यक्त गरे। “कानुन दिवसको यो अवसरले न्याय र कानुनको क्षेत्रमा कार्यरत सबैलाई आफ्नो जिम्मेवारीको महत्त्व पुनः सम्झाउनेछ,” उनले भने।
राष्ट्रपति पौडेलले इतिहासको दृष्टिकोणबाट राज्यका कार्यकारी, विधायिका र न्यायिक अधिकार एउटै निकायबाट प्रयोग भइरहेको अवस्थामा २००८ मा लागू भएको प्रधान न्यायालय ऐनले न्यायपालिकाको स्वतन्त्रता र शक्ति पृथकीकरणको अवधारणा स्थापित गरेको उल्लेख गरे। यसले न्याय सम्पादनमा नयाँ युगको थालनी गरेको उनले बताए।
नेपालको संविधानको मर्म र वर्तमान आवश्यकता अनुसार नयाँ कानुन निर्माण र प्रचलित कानुनमा सुधारका लागि पनि राष्ट्रपति पौडेलले आवश्यक कदम चाल्नुपर्ने कुरा औंल्याए। उनले भने, “आधुनिक पद्धति र प्रविधिको प्रयोगमार्फत आम नागरिकको न्यायमा सहज पहुँच र शीघ्र न्याय प्राप्ति सुनिश्चित गर्नुपर्नेछ।” “विधिको शासन कायम राख्दै न्यायिक मूल्य र मान्यतामा क्षति नगरी न्यायपालिकामा जनआस्थाको वृद्धिका लागि कानुन दिवसले सबैलाई सकारात्मक सोच, हौसला र प्रेरणा प्रदान गर्न सकोस्,” राष्ट्रपति पौडेलले शुभेच्छा दिएका छन्।
