काठमाडाैं । भारतका प्रधानमन्त्री नरेन्द्र मोदीले यसै महिना अमेरिकाको भ्रमण गर्दैछन् । उनको अमेरिका भ्रमणअघि वासिङ्टनले भारत एक जीवन्त लोकतन्त्र भएको राष्ट्र भएको बताएको छ ।
अमेरिकी राष्ट्रपतिको कार्यालय ह्वाइट हाउसका राष्ट्रिय सुरक्षा प्रवक्ता जोन किर्बीले भनेका छन्, ‘भारत एक जीवन्त लोकतन्त्र हो । कोही मान्छे दिल्लीको भ्रमण गर्छ भने उसले त्यो आफैँ देख्नेछ ।’
मोदीले अमेरिकाको भ्रमण गर्ने भएपछि ह्वाइट हाउसमा पत्रकारहरूले किर्बीलाई भारतीय लोकतन्त्र र मोदीको कार्यकालमा भएका अलोकतान्त्रिक कामबारे प्रश्न गरेकाे बीबीसीले उल्लेख गरेकाे छ ।
उनले उत्तरमा भनेका छन्,‘हामी ती सरोकारका विषयहरूमा आवाज उठाउन पछि हट्दैनौँ, हामी हाम्रा चिन्ताहरू हाम्रा साझेदारसँग राख्न तयार छौँ । प्रजातान्त्रिक संस्थाहरूलाई बलियो बनाउने विषयमा छलफल जारी रहनेछ र प्रधानमन्त्री मोदीको आगामी अमेरिका भ्रमणमा यो विषय छलफलको हिस्सा पनि हो ।’
त्यसपछि नै उनले भारत एक जीवतन्त्र लोकतन्त्र भएको मुलुक रहेकाे र नपत्याए भारत भ्रमण गर्न सुझाव पनि दिए । आगामी जुन २२ मा मोदी अमेरिका पुग्दा सोही दिन मोदी र अमेरिकी राष्ट्रपति बाइडेनले सँगै रात्रिभोज पनि गर्नेछन् ।
