काठमाडौं । युक्रेनसँगको युद्धको बीचमा रुसमा दुईवटा ठूला विस्फोटको खबर सार्वजनिक भएको छ । रुसी मिडियाका अनुसार यी दुई विष्फोट रुसको बेल्गोरोडमा भएका हुन् । बेल्गोरोडका गभर्नरले यी विस्फोटको पुष्टि गरेका छन् ।
बेल्गोरोड युक्रेनको सीमानामा रहेको रुसी सहर हो । यो खार्किवबाट मात्र ४० किलोमिटर टाढा छ । युक्रेनसँगको युद्धका क्रममा रुसले पनि बेलगोरोडमा कुनै पनि परिस्थितिसँग जुध्न व्यापक सुरक्षा व्यवस्था गरेको थियो । तर, यी सबैको बीचमा बेल्गोरोडमा विस्फोटको खबर बाहिर आएको छ । यद्यपी यी विष्फोट युक्रेन युद्धसँग सम्बन्धित छन् वा छैनन् भन्ने पुष्टि हुन बाँकी छ ।
यसअघि रुसले दुई युक्रेनी हेलिकप्टर बेलगोरोडमा प्रवेश गरी आवासीय भवनमा आक्रमण गरेको दाबी गरेको थियो । यसअघि रुसले युक्रेनले बेलगोरोडको रेल पुलमा आक्रमण गरेको आरोप लगाएको थियो । तर, युक्रेनले यी दाबीहरूलाई अस्वीकार गरेको छ।
रुसले युक्रेनमा लगातार बमबारी गरिरहेको छ । तर, युक्रेनले पनि केही हदसम्म रुसी लक्ष्यलाई निशाना बनाएको छ । हालै युक्रेनको आक्रमणमा ब्ल्याक सीमा रहेको रुसी मिसाइल क्रुजर ‘मोस्क्वा’ ध्वस्त भएको थियो ।
स्लाभा क्लास मिसाइल क्रूजर सन् १९७९ मा प्रक्षेपण गरिएको थियो । यसमा 16 वटा एन्टी-शिप मिसाइलहरू र धेरै एयर डिफेन्स मिसाइलहरू, टारपेडो र बन्दुकहरू तैनाथ गरिएका थिए। रुसले युक्रेनसँगको युद्धमा पनि यो युद्धपोत प्रयोग गर्दै आएको थियो ।
युक्रेनले ओडेसामा लुकेको नेप्च्युन एन्टी-शिप मिसाइलको ब्याट्रीले मोस्कभामा दुई पटक प्रहार गरेको दाबी गरेको छ। यसबाट यो युद्धपोत पूर्ण रुपमा ध्वस्त भएको थियो ।
