काठमाडाैं । केही दिनदेखि रोकिएको फोहोर काठमाडाैं महानगरपालिकाले भोलिदेखि उठाउने भएको छ ।
महानगरपालिकाले बुधबार एक सूचना निकालेर भोली बिहान ६ बजेदेखि फोहोर उठाउन सुरु गरिने भएकाले पायक पर्ने ठाउँमा फोहोर संकलन गरेर राख्न नागरिकलाई अनुरोध गरेको छ ।
बञ्चरेडाँडासम्म फोहोर लैजाने सडक निर्माणको काम आजसम्ममा सकिने भएकाले भोलिदेखि फोहोर उठाउन सुरु गरिने महानगरपालिकाले जनाएको छ ।
केही दिन अघि महानगरले एक हप्तासम्म फोहोर नउठ्ने जानकारी गराएको थियो । आफ्नो घरभित्र फोहोरको अल्पकालीन व्यवस्थापन गरी चोक, सडक र गल्लीलाई फोहोर हुन रोकेर सफा र स्वच्छ राखेकामा महानगरबासीलाई काठमाण्डौ महानगरले धन्यवादसमेत दिएको छ ।
आउँदा दिनमा पनि यस्तै सहयोगको अपेक्षा गरिएको महानगरपालिकाले जनाएको छ ।
