काठमाडाैं । निलम्बित प्रधानन्यायाधीश चोलेन्द्र शमशेर जबराले शेरबहादुर देउवा नेतृत्वमा सरकार बनाउन परमादेश जारी गर्ने पाँच न्यायाधीशमध्ये आफूमाथि मात्रै महाअभियोग लगाइएकोमा गुनासाे व्यक्त गरेका छन् ।
त्यसअघि उनले आफूविरुद्ध गत फागुन १ गते सत्तारुढ दलहरुले लगाएको महाअभियोग संविधानत: निष्क्रिय भइसकेको बताएका थिए ।
जबराले आफूले गरेका फैसलामाथि प्रश्न उठ्नु कुनै अनौठो नभएको तर्क पनि गरे । उनका अनुसार जसले चाहेअनुसारकाे फैसला हुन्न त्याे पक्ष रिसाउनु स्वभाविक हाे ।
जबराले गत असार २८ गते केपी ओली सरकारलाई विस्थापित गर्दै शेरबहादुर देउवालाई प्रधानमन्त्री बनाउन परमादेश जारी गरेका थिए । त्यतिबेला एमाले असन्तुष्ट भएकाे उनकाे तर्क छ ।
उनले भने ‘गठबन्धनको सरकार बनाउन परमादेश दिँदा पनि एउटा पक्ष असन्तुष्ट थियो । मैले गरेको फैसला एउटा पक्षबाहेक सबैले ठीक भने । यही गठबन्धनले पनि यो फैसला ठीक छ भन्यो । तर त्यो फैसला गर्ने अरु न्यायाधीश छाडेर महाअभियोग मविरुद्ध मात्रै किन लगाइयो ? अरु चारजनाविरुद्ध किन लगाइएन ?’
उनले यो फैसलाका आधारमा खासमा आफूमाथि महाअभियोग एमालेले लगाउनुपर्ने तर्क गरे। ‘खासमा त्यस फैसलालाई लिएर महाअभियोग त एमालेले लगाउनुपर्ने हो’ उनले भने ।
