जापान । गलकाेट स्पोर्ट्स क्लब टोकियाे, जापानले नवौं वार्षिकोत्सव तथा आठौँ सिल्भर रनिङ पुरुष भलिबल प्रतियाेगिता सम्पन्न गरेकाे छ । उक्त प्रतियाेगिताकाे उपाधि पर्वत समाज, जापानले उचाल्याे ।
यसैगरी, उप विजेताकाे ट्रफी घुम्टे युवा परिवार, जापान शाखाले हात पार्न सफल भयाे ।
प्रतियोगितामा विजेता हुने पर्वत समाज जापानले नगद ३ लाख १९ हजार ९ सय ९९ येन नगद, रनिंग सिल्भर कप ट्रफी, मेडल र प्रमाण-पत्र पाएको छ ।
उपबिजेता घुम्टे युवा परिवार, जापान शाखाले नगद २ लाख १९ हजार ९ सय ९९ येन नगद, ट्रफी, मेडल र प्रमाण-पत्र पाएकाे छ ।
सेमिफाइनलिष्ट समूह सान्त्वना गल्कोट स्पोर्ट क्लब टोक्यो र गलकाेट समाज जापानले पुरस्कार स्वरूप ५५ हजार ५ सय ५५ येन र प्रमाण-पत्र पाएको छ ।
‘स्वास्थ्य का लागि खेलकुद, राष्ट्रका का लागि खेलकुद’ भन्ने मूल उद्देश्यका साथ स्थापित भएको यस संस्था ‘गल्कोट स्पोर्ट्स क्लब टोकियो’ले राष्ट्रिय खेल भलिबलको संरक्षण संवर्द्धन, विकास र प्रवासमा रहेका खेलाडीहरुलाई क्रियाशील बनाइराख्नको लागि क्लबले आफ्नो स्थापनाकालदेखि भलिबल प्रतियोगितालाई निरन्तरता दिइरहेकाे छ । क्लबले उक्त प्रतियाेगिता जापानकाे टाेकियाे कामतामा आयाेजना गरेकाे थियाे ।
कार्यक्रम क्लबका अध्यक्ष डिलाराम निउरेकाे सभापतित्वमा र गलकाेट समाज जापानकी केन्द्रीय अध्यक्ष कालिका थापाकाे प्रमुख आतिथ्यमा सम्पन्न भएकाे थियाे ।
कार्यक्रममा विशिष्ट अतिथि क्लबका संरक्षक गिरि शेरचन, रत्न सिंह बस्नेत, लक्ष्मण कार्की एनआरएनए जापानका वरिष्ठ उपाध्यक्ष क्लबका सल्लाहकार नवीन निउरे रहेका थिए । यसैगरी, कार्यक्रममा विभिन्न संस्थाका प्रतिनिधि, पत्रकार, जापान निवासी नेपाली तथा खेलप्रेमी, क्लबलाई सहयाेग गर्ने दाताहरुकाे उपस्थिति रहेकाे थियाे ।
कार्यक्रममा स्वागत मन्तव्य स्पोर्ट क्लबका सचिव दिनेश थापाले दिएका थिए भने कार्यक्रम सञ्चालन महासचिव हिमाल कँडेलले गरेका थिए । टाेकियोको कामातामा रहेको ओता सिटी जेनरल म्युजियम हलमा भएको प्रतिस्पर्धामा १२ टिम सहभागी थिए ।
प्रतियोगितामा विजेता टिम भित्रबाट सबैभन्दा उत्कृष्ट खेल पर्दशन गर्ने खेलाडीलाई म्यान अफ द म्याचको उपाधीद्वारा पुरस्कृत गरिएको थियो ।
उक्त विधा अन्तर्गतको विजेता टिम पर्वत समाज, जापानको टिमबाट उत्कृष्ट खेलाडी देव शर्मा ‘माइला’, बेष्ट क्विकर प्रकाश चन्द्र जोशी, बेष्ट सेटर उमेश लामिछाने, बेष्ट कोच सुभाष लामिछाने र उपविजेता घुम्टे युवा परिवार, जापानको टिमबाट बेष्ट स्पाइकर प्रदिप गुरुङ बेष्ट बल्कर धिरेन्द्र सिंह ठकुरी र बेष्ट डिफेन्डर मनोज केसीलाई ट्रफीद्वारा पुरस्कृत गरिएको खेल संयोजक गणेश केसीले जानकारी दिए ।
प्रतियोगिताको औपचारिक कार्यक्रममा आर्थिक सहयोग गर्ने सहयोगदाता, संस्थागत सहकार्य गर्नुहुने सामाजिक संघसंस्था, समाजसेवी व्यक्तित्व, त्यसैगरी, नेपालबाट जापानका विभिन्न शहरमा सांगितिक कार्यक्रम लिएर आएको नेपालको इन्द्रेणी टिमलाई घुम्टे नौमति बाजासहित, सम्मान पत्र, मायाको चिनो र खादाद्वारा अध्यक्ष डिलाराम निउरे, प्रमुख अतिथि गलकोट समाज जापानकी अध्यक्ष कालिका थापा, संरक्षक गिरी शेरचन, रत्नसिंह बस्नेत, लक्ष्मण कार्की र सल्लाहकार, विशिष्ट अतिथि र अतिथिहरुले सम्मान गरेकाे संस्थाका सचिव दिनेश थापाले बताए ।
खेल संचालनका लागि रेफ्री, प्राविधिक तर्फको सम्पूर्ण जिम्मेवारी नेपाल भलिबल संघ जापान शाखाले सहयोग उपलब्ध गराएको थियो भने नेपाल भलिबल संघ गण्डकी प्रदेशका अध्यक्ष नविन गरुङको संयोजकत्वमा सम्पूर्ण खेल सञ्चालन गरिएको थियो । उद्घाटन खेल प्रमुख अतिथि, कालिका थापाबाट र फाइनल खेलमा प्रमुख अतिथि, संरक्षक र सिल्भर कप प्रायोजक गर्ने चन्द्र केसीबाट हस्तान्तरण गरि सुरुवात गरिएको थियो ।
सन् २०१५ सालमा स्थापना भएको संस्थाले स्थापना कालदेखि नै खेलकुद क्षेत्रमा विशेष योगदान पुर्याउने एक जना व्यक्तिलाई सम्मान गर्दै आइरहेकोमा यस पटक सो सम्मान पश्चिमाञ्चल नेपाल भलिबल संघका संस्थापक अध्यक्ष श्री गुरुङलाई दिइएकाे थियाे । यसैगरी, संस्थाको स्थापना कालदेखि गल्कोट स्पोर्ट्स क्लब टोकियोको प्रतिनिधित्व गर्दै खेलको माध्यमबाट संस्थाको गरिमा फराकिलो बनाएकोमा १८ जना खेलाडीलाई कार्यक्रममा सम्मान गरिएको अध्यक्ष डिलाराम निउरेले बताए ।
खेल प्रचलित नियम अनुसार नक-आउट सिस्टममा नेपाली रेफ्री द्वारा सञ्चालन भएको थियो । खेल टोकियोको कामाता स्पोर्ट्स सेन्टरमा मंगलबार बिहान १० बजेदेखि सुरु भएकाे थियाे । प्रतियोगिता भव्य र उत्साह पूर्वक सम्पन्न भएकाे महासचिव हिमाल कँडेलले जानकारी दिए ।
