काठमाडौं । काठमाडौं महानगरपालिकाले बालाजुमा रहेको कोत:धुकु पेट्रोल पम्प सिल गरेको छ ।
बिहीबार महानगरले बालाजुमा रहेको कोत:धुकु आयल स्टोर सिल गरेको नगर प्रहरी उपरीक्षक राजुनाथ पाण्डेले जानकारी दिए ।
उनका अनुसार पेट्रोल पम्प मापदण्डविपरीत भएको कारण सिल गरिएको हो ।
केही समयअघि महानगरले सडक किनार साँघुरो क्षेत्रमा पेट्रोल पम्प चलाउनु मापदण्डविपरीत भन्दै कारबाही गर्ने बताएको थियो ।
‘महानगरले त्यस्ता पम्प सुरक्षा दृष्टिले जोखिमयुक्त भएकाले कारबाही गरेको हो’, उनले भने ।
महानगरले झन्डै ६ वर्षअघि पेट्रोल पम्पको सर्वेक्षण गर्दा काठमाडौंमा १ सय २३ वटा पम्प थिए । जसमध्ये ६७ वटा महानगरभित्र थिए ।
त्यसमध्ये पनि झन्डै १० वटा पम्प जोखिमपूर्ण अवस्थामा भएका कारणले कोत:धुकु आयल स्टोरबाट काम सुरू गरिएको उनले बताए ।
