जापान । गैरआवासीय नेपाली संघ (एनआरएनए)काे अध्यक्ष पदका लागि हाल उपाध्यक्ष रहेका महेशकुमार श्रेष्ठले उम्मेदवारी घाेषणा गरेका छन् ।
‘समुन्नत नेपाली, सम्मानित प्रवासी नेपाली’ भन्ने मूल नाराकासाथ एनआरएनएकाे शाख जाेगाउनका लागि र एनआरएनए अझ सशक्त बनाउनकाे लागि आफूले अध्यक्ष पदमा उम्मेदवार दिने निर्णय गरेकाे श्रेष्ठले बताए ।
एनआरएनएकाे १० औँ महाधिवेशनबाट तीन–तीन जना अध्यक्ष बनेपछि संस्थाप्रति नकारात्मक सन्देश गएको र एनआरएनएलाई हेर्ने दृष्टिकाेणमा परिवर्तन आएकाे उनकाे बुझाइ छ । अब याे संस्थाप्रति गुमेकाे शाख फेरि फिर्ता ल्याउने गरी काम गर्न आफू सक्षम भएकाले आफ्नाे उम्मेदवारी रहेकाे पनि उनले स्पष्ट पारे ।
सहमति, सहकार्य र एकता नै आजको आवश्यकता भएकाले सबैलाई समेट्न सक्छु भन्ने विश्वास राख्दै सकभर निर्विराेधकाे अपेक्षा पनि उनले गरेका छन् । श्रेष्ठले अध्यक्षमा उमेद्वारी दिने सबै गैरआवासीय नेपालीहरुमा साथ सहयोग र समर्थन गर्न अपिल पनि गरेका छन् ।
जापानमा रहेका पुराना तथा स्थापित व्यवसायी श्रेष्ठले एनआरएन कोषाध्यक्ष हुँदै हाल उपाध्यक्ष भएर काम गरिरहेका छन् । गैरआवासीय नेपाली सङ्घको एघारौँ विश्व सम्मेलन तथा निर्वाचन असोज ३० गतदेखि कार्तिक ३ गतेसम्म काठमाडौंमा हुँदैछ ।
