काठमाडौं ।पहलगाममा भएको आक्रमणपछिको तनावपूर्ण परिस्थितिमा भारतले पाकिस्तानी विमानका लागि आफ्नो हवाई क्षेत्र बन्द गर्ने निर्णय गरेको छ। भारतीय अधिकारीहरूका अनुसार यो प्रतिबन्ध मे १ देखि मे २३ सम्म लागू हुनेछ।
भारतीय विमानस्थल प्राधिकरण (एएआई) ले बुधबार साँझ जारी गरेको ‘नोटिस टू एयरमेन’ (NOTAM) मार्फत यो निर्णय सार्वजनिक गरिएको हो।प्रतिबन्ध अनुसार, पाकिस्तानमा दर्ता भएका, पाकिस्तानी एयरलाइन्स र अपरेटरहरूले सञ्चालित, स्वामित्वमा रहेका वा भाडामा लिइएका कुनै पनि विमानलाई भारतीय हवाई क्षेत्र प्रयोग गर्न नदिइनेछ। यद्यपि भारत र पाकिस्तानबीच प्रत्यक्ष उडानहरू नभए पनि पाकिस्तानी एयरलाइन्सहरूले सिंगापुर, मलेसिया र अन्य पूर्वी एसियाली मुलुकहरूमा जाने क्रममा भारतीय आकाश मार्ग प्रयोग गर्ने गर्छन्।
अप्रिल २२ मा पहलगाममा भएको आक्रमणपछिको भोलिपल्ट, अप्रिल २३ मा भारतले पाकिस्तानमाथि कडा कदम चालेको थियो। यसअन्तर्गत, भारतले सिन्धु जल सन्धि निलम्बन गर्ने, अटारीमा रहेको स्थल सीमा बन्द गर्ने र कूटनीतिक सम्बन्धमा कटौती गर्ने निर्णय गरेको थियो।पाकिस्तानले यसका जवाफमा भारतीय विमानका लागि आफ्नो हवाई क्षेत्र बन्द गरिसकेको छ र तेस्रो मुलुकमार्फत भारतसँग भइरहेको सम्पूर्ण व्यापार पनि निलम्बन गरिसकेको छ।
