काठमाडौं । वैदेशिक रोजगारीको प्रलोभन देखाएर लाखौं रुपैयाँ ठगी गर्ने चार जनालाई प्रहरीले पक्राउ गरेको छ। ती चारै जना काठमाडौंका विभिन्न स्थानबाट पक्राउ परेका हुन्।
प्रहरीका अनुसार पक्राउ पर्नेमा काठमाडौं महानगरपालिका–१३ बस्ने २६ वर्षीय अक्षय श्रेष्ठ, बुढानीलकण्ठ नगरपालिका–१० बस्ने र काठमाडौं–३१ स्थायी घर भएका २४ वर्षीय सुसान चुडाल, काठमाडौं–१४ बस्ने र सुर्खेत सिम्ता गाउँपालिका–१ स्थायी घर भएका ३० वर्षीय प्रदीप हमाल र काठमाडौं–३१ बस्ने र दाङ तुलसीपुर उपमहानगरपालिका–६ स्थायी घर भएकी ३६ वर्षीया मञ्जु दाहाल छन्।
उनीहरूले युके, बोस्निया, अजरबैजान र अमेरिका पठाइदिन्छु भन्दै विभिन्न व्यक्तिहरूलाई ठूलो रकम असुली सम्पर्कबिहीन भएको उजुरीका आधारमा पक्राउ गरिएको हो।
अभियोजनअनुसार, अक्षय श्रेष्ठले युके पठाइदिन्छु भन्दै ३ जना पीडितबाट २७ लाख २९ हजार रुपैयाँ, सुसान चुडालले बोस्निया र हर्जगोभिना पठाइदिन्छु भन्दै ६ जना पीडितबाट ३६ लाख ६३ हजार रुपैयाँ, प्रदीप हमालले अजरबैजान पठाइदिन्छु भन्दै १ जना पीडितबाट ६ लाख २० हजार रुपैयाँ र मञ्जु दाहालले अमेरिका पठाइदिन्छु भन्दै १ जना पीडितबाट १ लाख ४० हजार रुपैयाँ लिएको बताइएको छ।
पीडितहरूको उजुरीपछि काठमाडौं उपत्यका अपराध अनुसन्धान कार्यालय टेकुबाट खटिएको टोलीले अक्षयलाई बुधबार काठमाडौं–१३ बाट, सुसानलाई काठमाडौं–३२ बाट, प्रदीपलाई काठमाडौं–२६ बाट र मञ्जुलाई काठमाडौं–१२ बाट बिहीबार पक्राउ गरेको हो।
पक्राउ परेकामध्ये अक्षयलाई जिल्ला प्रहरी परिसर काठमाडौंमा अनुसन्धानका लागि पठाइएको छ भने अन्य तीन जनालाई वैदेशिक रोजगार विभाग, ताहाचलमा बुझाइएको छ।
