काठमाडौं । काठमाडौं उपत्यकामा जारी आपराधिक गतिविधिविरुद्धको प्रहरी अभियान अविरल रुपमा जारी रहने जिल्ला प्रहरी परिसर काठमाडौंले स्पष्ट पारेको छ। परिसर प्रमुख प्रहरी वरिष्ठ उपरीक्षक (एसएसपी) विश्व अधिकारीले उपत्यकामा आपराधिक गतिविधि नियन्त्रण गर्न अपरेशन तीव्र पारिएको बताएका छन्।
‘गुण्डाहरूले टाउको उठाउने ठाउँ पाउने छैनन्, हाम्रो अपरेशन जारी छ,’ एसएसपी अधिकारीले भने, ‘काठमाडौँमा यस्ता अवाञ्छित गतिविधि गरेकाहरूको नामावली सङ्कलन भइसकेको छ, खोजीखोजी कारबाहीको दायरामा ल्याइँदै छ।’
उक्त अपरेशनअन्तर्गत शुक्रबार काठमाडौंको महाराजगञ्जस्थित होटल साम्बालाबाट ४७ जनालाई प्रहरीले पक्राउ गरेको थियो। पक्राउ पर्नेहरूमा चर्चित व्यक्तित्व चक्रे मिलन भनिने मिलन गुरुङ पनि रहेका छन्।
पक्राउ परेका १९ जनामाथि सार्वजनिक हितविपरीत गतिविधि गरेको कसुरमा मुद्दा दर्ता गरी सात दिनको म्याद थपेर अनुसन्धान सुरु गरिएको छ। बाँकी २८ जनालाई भने प्रहरीमा नियमित हाजिर हुने सर्तमा छाडिएको छ। तर उनीहरूमाथि पनि अनुसन्धान जारी रहेको प्रहरीले जनाएको छ।
एसएसपी अधिकारीका अनुसार, ‘१९ जनाविरुद्ध अन्य उजुरीहरू आउन सक्ने भएकाले जो कोहीले पनि उजुरी दिन सक्नुहुन्छ। उनीहरू अन्य के–के आपराधिक गतिविधिमा संलग्न छन् भनेर पनि खोजी भइरहेको छ।’
काठमाडौँ उपत्यका अपराध अनुसन्धान कार्यालयको सहयोगमा सो अपरेशन सञ्चालन भइरहेको हो। प्रहरीले गुण्डागर्दी, ठगी, अवैध कारोबार र सार्वजनिक हितविपरीतका गतिविधिहरू नियन्त्रण गर्न यो अभियानलाई निरन्तरता दिने स्पष्ट संकेत दिएको छ।
प्रहरीका अनुसार, अपराध नियन्त्रणको लागि सुराकी तन्त्र सुदृढ बनाइएको छ र अपराधमा संलग्न कसैलाई पनि उन्मुक्ति नदिने नीति लिइएको छ।
