रुसले युक्रेनको किभमा भारी बमबारी गरेको छ । युक्रेनमा पूर्ण रूपमा आक्रमण शुरू भएपछि रूसले किभमा दोस्रो ठूलो हवाई आक्रमण गरेको हो । जसमा चार बालबालिकासहित कम्तिमा २१ जनाको मृत्यु भएको अन्तर्राष्ट्रिय सञ्चारमाध्यमहरुले जनाएका छन् ।
समाचारअनुसार बिहीबारको आक्रमणमा युरोपेली संघ र ब्रिटिश काउन्सिलका भवनहरू क्षतिग्रस्त भएका छन्, जसका कारण ईयू र बेलायत दुवैले आ–आफ्ना राजधानीमा रहेका शीर्ष रूसी कूटनीतिज्ञहरूलाई बोलाएका छन् ।
युक्रेनको वायु सेनाले क्रेमलिनले रातारात देशमा ६२९ हवाई आक्रमण प्रहार गरेको जनाएको छ । जसमा ५९८ ड्रोन र ३१ वटा मिसाइलहरू थिए । यो जुन महिनायताकै राजधानीमा भएको सबैभन्दा ठूलो हमला हो ।
मारिनेहरूमध्ये धेरैजसो किभको दक्षिणपूर्वी दार्नित्स्की जिल्लाको बायाँ किनारामा रहेको एउटा पाँचतले आवासीय भवनका थिए । एउटा क्षेप्यास्त्रले बिहान करिब ३ बजे सो फ्ल्याटहरूको ब्लकलाई ध्वस्त पारेको थियो । रुसको रक्षा मन्त्रालयले उच्च हतियारहरू प्रयोग गरेर युक्रेनमा आक्रमण गरेको जनाएको छ ।
युरोपेली संघ र बेलायतको प्रतिक्रिया
युरोपेली संघको कार्यकारी आयोगकी प्रमुख उर्जुला फोन डेर लाइअनले युक्रेनको राजधानी किएभमा हालै भएको रुसी क्षेप्यास्त्र आक्रमणप्रति तीव्र आक्रोश व्यक्त गरेकी छन्। युरोपेली संघका विदेश नीति प्रमुख काया कालासले आक्रमणलाई जानी–जानी तनाव बढाउने कार्य गरेको भन्दै कडा शब्दमा आलोचना गरेकी छन्।
बेलायती प्रधानमन्त्री सर किअर स्टार्मरले रुसी राष्ट्रपति भ्लादिमिर पुटिनमाथि शान्तिको सम्भावना बिगार्ने नियतसाथ हमला गरेको आरोप लगाए। बेलायतका लागि रुसी राजदूत आन्द्रेइ केलिनलाई विदेश मन्त्रालयमा बोलाइएको छ भने युरोपेली संघले पनि ब्रसेल्सस्थित रुसी उपनियोग प्रमुखलाई तलबासी गरेको छ।
किएभमाथिको यस महिनाकै ठूलो आक्रमण
युक्रेनी सेनाका अनुसार रुसले बिहीबार राति मात्रै करिब ६०० ड्रोन र ३० भन्दा बढी बलिस्टिक तथा क्रूज क्षेप्यास्त्र प्रहार गरेको थियो। यस महिनाको सबैभन्दा भीषण आक्रमण मानिएको यो घटनाले युक्रेनको ऊर्जा पूर्वाधार र आवासीय क्षेत्रहरूमा ठूलो क्षति पुर्याएको छ।
यसअघि बुधवार भएका ड्रोन आक्रमणका कारण एक लाखभन्दा बढी घरमा विद्युत् आपूर्ति बन्द भएको थियो। पछिल्लो आक्रमणपछि मध्यभिनिट्सिया क्षेत्रमा थप ६०,००० उपभोक्ता विद्युत् आपूर्तिबाट वञ्चित भएका छन्।
क्रेम्लिनको रुखो सन्देश, वार्ताको भ्रम
युक्रेनी राष्ट्रपति भोलोदिमिर जेलेन्स्कीले रुसमाथि ‘नयाँ, कडा प्रतिबन्ध’ आवश्यक रहेको बताएका छन्। उनले भने, ‘मस्कोले वार्ताको टेबल होइन, क्षेप्यास्त्र रोजेको छ। यी आक्रमणहरू युद्धविराम र कूटनीतिक प्रयासप्रति रूसी नेतृत्वको स्पष्ट अस्वीकार हो।’
यद्यपि क्रेम्लिनले भने रुस अझै वार्तामा इच्छुक रहेको दाबी गरेको छ। तर, युरोपेली नेताहरूले यस्ता आक्रमणहरूले रुसको दुईमुखे नीति उजागर गरेको बताएका छन्।
डान्यूब नदीमा समुद्री हमला
यसबाहेक, रुसी सेनाले युक्रेनी जलसेनाको ‘सिम्फेरोपोल’ नामक पानीजहाजमाथि मानवरहित स्पीडबोटद्वारा आक्रमण गरेको दाबी गरेको छ। यो जहाज डान्यूब नदीको मुखमा गुप्तचरी गर्न प्रयोग भइरहेको बताइएको छ। आक्रमणमा एक जनाको मृत्यु भएको र धेरै घाइते भएको जनाइएको छ, यद्यपि युक्रेनी पक्षले आक्रमणको स्थान खुलाएको छैन।
किएभमा यति ठूलो आक्रमण युक्रेनमाथिको युद्ध अझ उग्र हुँदै गएको सङ्केत हो। युरोपेली संघ, बेलायत र अन्य पश्चिमा शक्तिहरूले रुसविरुद्ध थप कडा प्रतिबन्ध र प्रतिरोधको नीति अवलम्बन गर्ने सम्भावना बलियो बनेको छ। जब शान्तिका लागि कूटनीतिक प्रयासहरू भइरहेका थिए, त्यसैबेला भएको यो आक्रमणले युद्ध अन्त्यको आशामा ठूलो धक्का पुर्याएको छ।
