सात वर्षपछि चीन पुगेका भारतीय प्रधानमन्त्री नरेन्द्र मोदीले चिनियाँ राष्ट्रपति सी जिनपिङसँग ५० मिनेट लामो भेटवार्ता गरेका छन्। भारतीय सञ्चारमाध्यमका अनुसार, भेटका क्रममा मोदीले अघिल्लो वर्ष कजानमा भएको छलफललाई सम्झँदै त्यसले दुई देशको सम्बन्ध सुधारमा सहयोग गरेको बताए।
उनले सीमाबाट सेना फिर्ता भएपछि शान्ति र स्थिरता कायम भएको, विशेष प्रतिनिधिहरूले सीमा विवादमा समझदारी हासिल गरेको, कैलाश मानसरोवर यात्रा पुनः सुरु भएको र भारत-चीनबीच सिधा उडानहरू फेरि सञ्चालनमा आएको जानकारी गराए।
प्रधानमन्त्री मोदीले भारत र चीनबीचको सहकार्यले २.८ अर्ब जनसंख्यालाई लाभ पुर्याउने र यो सहयोगले समग्र मानवताको हितमा योगदान पुर्याउने विश्वास व्यक्त गरे। भेटपछि राष्ट्रपति सी जिनपिङले मोदीसँग भेट भएकोमा खुशी व्यक्त गर्दै भारत र चीनको सहकार्य अत्यन्त महत्त्वपूर्ण भएको बताए।
दुबै नेताले पारस्परिक विश्वास र सम्मानका आधारमा आपसी सम्बन्ध अघि बढाउने प्रतिबद्धता व्यक्त गरेका छन्।
प्रधानमन्त्री मोदी जापानको दुईदिने भ्रमणपछि शनिबार साँझ चीन पुगेका हुन्। २०२० मा गलवानमा भएको सैन्य झडपपछि दुबै देशबीचको सम्बन्ध चिसिएको थियो, र अहिलेको भ्रमणको उद्देश्य पनि सीमा तनाव कम गर्नु रहेको बताइएको छ।
मोदी चीनको तियानजिन सहरमा आयोजना हुने सांघाई सहयोग संगठन (एससीओ) को बैठकमा सहभागी हुनेछन्। यो सम्मेलन इतिहासकै सबैभन्दा ठूलो एससीओ शिखर सम्मेलन मानिएको छ, जहाँ २० भन्दा बढी देशका प्रतिनिधिहरूको सहभागिता रहनेछ। प्रधानमन्त्री मोदीले सोमबार रुसी राष्ट्रपति भ्लादिमिर पुटिनसँग पनि भेटवार्ता गर्ने कार्यक्रम रहेको छ।
