काठमाडौँ । राष्ट्रिय स्वतन्त्र पार्टी (रास्वपा) की नेतृ तथा पूर्वस्वास्थ्य राज्यमन्त्री डा. तोसिमा कार्कीले आफू पार्टी छोड्ने हल्ला पूर्णतः असत्य भएको स्पष्ट पारेकी छिन् ।
हालै सुमना श्रेष्ठले रास्वपा परित्याग गरेको घोषणापछि कार्की पनि पार्टी छोड्न लागेकी भन्ने चर्चाले तातो बनिरहेका बेला उनले आइतबार सामाजिक सञ्जालमार्फत ती आरोपको खण्डन गरेकी हुन् ।
फेसबुकमा कार्कीले भनिन्, ‘तोसिमाले पार्टी छोड्यो भनेर भन्न भ्याइसकेछन् । कम्तीमा मलाई त सोध्नोस् । देश अहिले गम्भीर अवस्थामा छ, यसलाई कसरी सुधार गर्न सकिन्छ भन्नेमा ध्यान दिनुहोस्, अफवाह नफैलाउनुहोस् ।’
उनले वर्तमान परिस्थिति मानसिक र भावनात्मक रूपमा विक्षिप्त र शून्य अवस्थामा पुगेको भन्दै सञ्चार माध्यमलाई जिम्मेवार भएर खबर सम्प्रेषण गर्न आग्रह गरेकी छिन् ।
