सर्लाहीको बयलबास बजारमा स्थानीय र प्रहरीबीच झडप भएपछि निषेधाज्ञा

सर्लाही । सर्लाहीको ईश्वरपुर नगरपालिकाकाे बयलबास बजारमा प्रहरी भ्यानको ठक्करबाट एक युवकको मृत्यु भएको विषयमा आन्दोलित स्थानीय र प्रहरीबीच झडप भएपछि निषेधाज्ञा जारी गरिएको छ ।

आइतबार राति ईश्वरपुर नगरपालिका–७ मा इलाका प्रहरी कार्यालय (केशरगञ्ज) को भ्यानले मोटरसाइकललाई ठक्कर दिँदा त्यसका चालक ईश्वरपुर नगरपालिका–५ का ३० वर्षीय रामकुमार महतोको मृत्यु भएको थियो ।

त्यही विषयमा प्रदर्शनकारीरूले निरन्तर ढुंगामुढा एवं तोडफोड गरेपछि बयलवास बजार क्षेत्रमा मंगलबार दिउँसो ३ बजेदेखि निषेधाज्ञा जारी गरिएको हो । प्रमुख जिल्ला अधिकारी स्थानेश्वर गौतमले बुधबार साँझ ७ बजेसम्मका लागि निषेधाज्ञा आदेश जारी गरेका हुन् ।