काठमाडाैं । चीनमा लगातार बढीरहेकाे काेराेना संक्रमणका कारण यतिबेला पुन: एक पटक विश्व त्रसित बनिरहेकाे छ ।
चीनमा कोरोनाका कारण तीव्र गतिमा बढ्दो केस र मृत्युको खबर अन्तरर्राष्ट्रिय सञ्चारमाध्यममा आइरहेका छन् ।
बीएफ.७ भेरियन्टका कारण कोरोनाको पछिल्लो लहर आएको बताइएको छ ।
आखिर के हो बीएफ.७ ?
बीएफ.७ लाई ओमिक्राेनकाे सब-भ्यारियन्टको रूपमा वर्णन गरिएको छ । सन् २०१९ मा पहिलो पटक भेटिएपछि कोरोना भाइरसका धेरै भेरियन्टहरू सार्वजनिक भएका छन् । जस्तै, डेल्टा र ओमिक्रोन ।
वैज्ञानिकहरूका अनुसार यी नयाँ भेरियन्टहरू भाइरसको परिवर्तनका कारण आएको हो । यसमा मौसम (चिसो, तातो) र रासायनिक (कुनै पनि औषधि) जस्ता भौगोलिक कारकहरू समावेश हुन सक्छन् ।
भाइरस परिवर्तनको प्रक्रियालाई प्राविधिक भाषामा उत्परिवर्तन भनिन्छ । बीएफ.७ भेरियन्टले चीनमा विनाश निम्त्याइरहेको छ ।
यो भाइरसका लक्षणहरु के-के हुन् ?
यसका कारण खाेकी लाग्ने, थकान महसुस हुने, नाकबाट पानी बग्ने, केही व्यक्तिहरुलाई पेट दुख्ने वा पखाला लाग्ने लक्षणहरू देखिएकाे बताइएकाे छ ।
बीएफ.७ छिटो फैलिन्छ । अनुसन्धानका अनुसार यो सब-भेरियन्टबाट संक्रमित बिरामीले १० देखि १८ जनामा भाइरस फैलाउन सक्छ । जबकि ओमिक्रोन भेरियन्टका कारण पाँचदेखि आठ जनामा संक्रमण फैलिएको पाइएको थियो ।
तर यो डेल्टा स्ट्रेन (भेरियन्ट) जत्तिकै घातक छैन । जसले विश्वभर विनाश निम्त्याएकाे थियाे ।
के कुरामा ध्यान दिने ?
भाइरस संक्रमणबाट बच्नका लागि अनिवार्य मास्क लगाउन स्वास्थ्य विज्ञहरुले सुझाव दिइरहेका छन् । नेपालमा स्वास्थ्य मन्त्रालयले विज्ञप्ति निकालेर सर्वसाधारणकाे ध्यानाकर्षण गराइसकेकाे छ ।
यदी संक्रमण भइहालेमा यसअघि ओमिक्राेन संक्रमण फैँलदा विशेषज्ञहरुले पारासिटामाेलकाे प्रयाेग गर्न सुझाव दिएका थिए । अहिले पनि यही प्रयाेग गर्नुपर्ने विज्ञहरुकाे भनाइ छ ।