जुपिटर मिडियाले सुरु गर्‍यो टेलिभिजन कार्यक्रम ‘डेस्टिनेशन अष्ट्रेलिया’

काठमाडाैं । जुपिटर मिडियाले टेलिभिजन कार्यक्रम प्याकेज ‘डेस्टिनेशन अष्ट्रेलिया’को शुरुवात गरेको छ । काठमाडाैंकाे मेरियट होटेलमा एक भव्य कार्यक्रमकाबीच प्याकेज डेस्टिनेशन अष्ट्रेलियाको शुरुवात गरिएको हो ।

नेपालका लागि अस्ट्रेलियाली राजदूत फेलिसिटी भोल्कलगायत अन्य विभिन्न पेशामा आवद्ध व्यक्तिहरुकाबीच उक्त कार्यक्रमको शुरुवात गरिएको हाे । कार्यक्रममा डेस्टिनेशन अष्ट्रेलियाबारे जानकारी दिने उद्देश्यले एउटा सानो श्रव्य-दृश्य सामग्रीसमेत प्रस्तुत गरिएको थियो ।

श्रव्य-दृश्य अवलोकन गर्दै कार्यक्रमकी मुख्य अतिथि राजदूत भोल्कले डेस्टिनेशन अष्ट्रेलिया कार्यक्रमले अस्ट्रेलियाको शैक्षिक प्रणालीका बारे यथार्थ जानकारी दिने विश्वास गरे । राजदूत भोल्कले अस्ट्रेलियाको शैक्षिक संस्थान र नेपालका विद्यार्थीहरुबीच डेस्टिनेशन अष्ट्रेलिया कार्यक्रमले एउटा पुलको काम गरेको र जुपिटर मिडियाको यो प्रस्तुति सम्भवतः नेपालको पहिलो भएको बताए ।

कार्यक्रमा स्वागत मन्तव्य राख्दै जुपिटर मिडियाका अध्यक्ष प्राध्यापक राजु आचार्यले डेस्टिनेसन अस्ट्रेलिया कार्यक्रम एक उत्कृष्ट शैक्षिक कार्यक्रम बनेकोमा खुशी व्यक्त गर्दै विभिन्न शैक्षिक संस्थान र परामर्श केन्द्रको साथ र सहयोग निरन्तर रहने विश्वास व्यक्त गरे । प्राध्यापक आचार्यले विद्यार्थीहरुको शैक्षिक र पेशागत जीवनको स्तर बढाउन यो कार्यक्रम एउटा कोशेढुंगा साबित हुने भनाइ राखेका थिए ।

कार्यक्रममा विभिन्न राष्ट्रिय र अन्तर्राष्ट्रिय शैक्षिक तथा सामाजिक संघ संस्थानका पदाधिकारी र प्रतिनिधिहरुले डेस्टिनेशन अष्ट्रेलिया कार्यक्रमको सफलताको शुभकामना दिएर आगामी दिनमा पनि जुपिटर मिडियाले यस्तै शैक्षिक उपयोगी सामग्री प्रस्तुत गर्ने विश्वास व्यक्त गरे ।

कार्यक्रमको अन्त्यमा धन्यवाद ज्ञापन दिँदै जुपिटर मिडियाका निर्देशक सुनिल आचार्यले डेस्टिनेशन अष्ट्रेलिया कार्यक्रमले अस्ट्रेलिया गएर उच्च शिक्षा हासिल गर्न चाहने विद्यार्थीहरुको सपना पूरा गर्ने प्रतिबद्धता व्यक्त गरे । जुपिटर मिडिया सँधै नेपालको शैक्षिक क्षेत्रको स्तारोन्नतिका लागि तत्पर रहेको बताउँदै निर्देशक आचार्यले आगामी दिनमा जुपिटर मिडिया अझ सशक्त रुपमा अघि बढ्ने बताए ।

कार्यक्रममा विभिन्न शैक्षिक परामर्श केन्द्र र संस्थानहरुलाई मायाको चिनो दिएर सम्मान गरिएको थियो । कार्यक्रम डेस्टिनेशन अष्ट्रेलियाले अष्ट्रेलियाका पाँच सहरका विश्वविद्यालय र शैक्षिक संस्थाहरूलाई समेटेको छ । यसका साथै, कार्यक्रमले हाल अस्ट्रेलियाका विभिन्न भागमा बसोबास गर्ने नेपाली समुदायहरूबीच उनीहरूको व्यक्तिगत र व्यावसायिक सफलतालाई प्रकाश पार्दै अन्तरक्रियात्मक सत्रहरू पनि प्याकेजमा प्रस्तुत गरेको छ ।

डेस्टिनेशन अष्ट्रेलिया कार्यक्रम न्युज २४ (NEWS 24) टेलिभिजनमा प्रसारण हुनेछ । अष्ट्रेलियामा उच्च शिक्षाको खोजीमा रहेका विद्यार्थीहरूका लागि यो शृङ्खला लाभदायी हुने आयोजकको अपेक्षा छ ।

© 2023 All right reserved Site By : Himal Creation || सञ्चार रजिस्ट्रार दर्ता नं : ०००९७