काठमाडौं । बलिउड अभिनेता सनी देओल र अमीषा पटेलको आगामी फिल्म ‘गदर २’ को दोस्रो गीत सार्वजनिक भएको छ ।
मंगलबार जी-म्यूजिक कम्पनी युट्युब च्यानलमार्फत ‘खैरियत’ बोलको गीत सार्वजनिक गरिएको हो । अरिजित सिंह र मिथूनको स्वर रहेको गीतमा सनी, अमीषा र उत्कर्श शर्मालाई देख्न सकिन्छ ।
सईद कादरीको शब्द रहेको गीतमा मिथूनले संगीत भरेका छन् । यसअघि फिल्ममा समावेशी ‘उड जा काले कावा’ बोलको गीत सार्वजनिक गरिएको थियो ।
अनिल शर्माले निर्देशन गरेको फिल्ममा सनी देओल, अमीषा पटेल, उत्कर्श शर्मा, मनिष वधवा, गौरव चोपडा, लुभ सिन्हा, सिम्राट कौरलगायत कलाकारको अभिनय छ । फिल्मको कथा शक्तिमान तलवारले लेखेका हुन् ।
नजीव खानले छायांकन गरेको फिल्मलाई सञ्जय संखलाले सम्पादन गरेका हुन् ।
यो फिल्म अगस्त ११ देखि प्रदर्शन हुनेछ ।
