‘निम्सदाई’ माथि प्रतिबन्ध लगाउन माग गर्ने कांग्रेस सांसद बजगाईँको गृहजिल्लामै विरोध

काठमाडौं। कीर्तिमानी पर्वतारोही निर्मल पूर्जा ‘निम्स दाई’ माथि प्रतिबन्ध लगाउनुपर्ने माग गर्दै नेपाली कांग्रेसका सांसद राजेन्द्र बजगाईँले प्रतिनिधि सभाको बैठकमा दिएको अभिव्यक्तिको उनकै गृहजिल्ला गोरखामा बिरोध भएको छ। गोरखाबाट निर्वाचित सांसद बजगाईँको अभिव्यक्ति प्रतिशोधपूर्ण भएको भन्दै युवाहरुले प्लेकार्डसहित बिरोध प्रदर्शन गरेका हुन्।

बिरोध प्रदर्शनको क्रममा युवाहरुले “राजेन्द्र बजगाईँ माफी माग”, “माननीय ज्यु गोरखाको जनताको कुरा बोलौं, आफ्नो ब्यापारको ईगो नासाधौँ”, “निम्स दाई संगको प्रतिशोध बन्द गर” जस्ता नाराहरु लगाएका थिए।

गत जेठ २२ गते प्रतिनिधिसभामा बजगाईंले व्यावसायिक पर्वतारोही तथा पूर्वमिस फिनल्यान्ड लोट्टा हिन्स्टामाथि यौन दुव्र्यवहारदेखि सगरमाथा चढ्ने डोरी काटेको भनेर अफवाह फैलाएका कारण पूर्जालाई नेपाल प्रवेशमा बन्देज लगाउन माग गरेका थिए ।

बजगाईँले मंगलबारको बैठकमा पनि फेरि यही कुरा दोहो¥याएका थिए ।

अनेरास्ववियुका प्रवक्ता प्रकाश पौडेलले पनि पर्वतारोही पूर्जामाथि प्रतिबन्ध लगाउने नेपाली कांग्रेसका सांसद बजगाईँको अभिव्यक्ति प्रतिशोधपूर्ण भएको आरोप लगाएका छन् ।

प्रवक्ता पौडेलले सामाजिक सञ्जालमार्फत सांसद बजगाईँले आफूले खोलेको होटलमा ग्राहक सहयोग नगरेको आधारमा पूर्जालाई खेद्ने दुस्साहस गरेको उल्लेख गरेका हुन् ।

उनले बजगाईँसँग सदनमा बोल्ने कुनै कुरा नभएकाले यही विषय पटक–पटक उठाइरहेको हो ? भनेर प्रश्न पनि गरेका छन् । पौडेलले सांसद बजगाईँमाथि पनि छानविन हुनुपर्ने उल्लेख गरेका छन् । उनले बजगाईँमाथि ‘टाइगर प्यालेस कसले ल्यायो, कसले भगायो ? नेपालबाट २२५ मिलियन पैसा युके कसले लग्यो ? टुकुचामाथि होटल कसले बनायो ?’ भनेर प्रश्न गरेका छन् ।

© 2024 All right reserved Site By : Himal Creation || सूचना विभाग दर्ता नं : ४१२१–२०८०/२०८१