बागलुङ । बागलुङ बहुउद्देश्यीय सहकारी संस्थाका अध्यक्षले आफ्नै कर्मचारीमाथि गालीगलाैज तथा हातपात गरेका छन् । संस्थामा प्रबन्धककाे रुपमा काम गर्दै आइरहेका दिनेश पन्तमाथि संस्थाका अध्यक्ष अशाेक गोविन्द राजभण्डारी र उनका छाेरा निलेश राजभण्डारीले गालीगलाैज तथा हातपात गरेकाे पन्तले बताएका हुन् ।
पन्तले सहकारीको मूल्य मान्यता तथा सहकारी ऐन नियम सहकारी विधान तथा कर्मचारी नियमावली बमोजिम कामकाज गर्दै आइरहेको साथै सहकारीको कामकाज पारदर्शि तथा व्यवस्थित रुपमा सञ्चालन गर्न खोज्दा संस्थाका अध्यक्ष राजभण्डारीले गाली–गलौज गर्ने, डर देखाउने तथा धाकधम्की दिने गरेकाे बताएका हुन् ।
उनले यसबारे संस्थाको संचालक समितिको बैठकमा समेत जानकारी गराएकाे पनि बताएका छन् । गएकाे असोज १ गते अध्यक्ष राजभण्डारी र उनका छोरा निलेशले कार्यालय समयमा काम गर्ने क्रममा पन्तमाथि गाली गलाैजसहित हातपात तथा दुर्व्यवहार गरेका हुन् ।
उनले यसबारे सहकारीको नियामक निकाय बागलुङ नगरपालिकामा लिखित रुपमा अनुसन्धान गरी आवश्यक कार्वाहिको लागि माग गरेकोमा अहिलेसम्म पनि कुनै जानकारीसमेत नगराएको तथा कार्वाहिको लागि प्रक्रिया अगाडि नबढाएको भन्दै जिल्ला प्रशासन कार्यालयमा पनि निवेदन दिएका छन् ।
राजभण्डारीले सहकारीका ५०० भन्दा बढी बचतकर्ताहरुको बचत खाता आफूखुशी बन्द गरी उक्त खाताहरुमा रहेको रकम आफ्नो खातामा सारी दूरुपयोग गरेकाे, बचत कर्ताहरुको रकम ठगी गरेको, आफू अनुकुल रुपमा कर्जा लगानी गरेको, विना शेयरलाई पनि कर्जा प्रदान गरेको, विनाधितो कर्जा लगानी गरेको, संस्थाको हिसावकिताब पनि ठिक नरहेको, कर्मचारीहरुको नियुक्ति तथा सेवासुविधाको विषयमा पनि विभेदकारी काम गरेकाे पन्तको आरोप छ ।
