काठमाडौं । नयाँ शक्ति पार्टीका अध्यक्ष डा. बाबुराम भट्टराईले उदारवादी र समाजवादी लोकतन्त्रलाई एउटै रुखका दुई हाँगा सम्झाएका छन्। बुधबार चन्द्रप्रसाद न्यौपाने स्मृति ग्रन्थको लोकार्पण कार्यक्रममा बोल्दै पूर्व प्रधानमन्त्री भट्टराईले दलहरूबीचको सहकार्यमार्फत मात्र लोकतान्त्रिक गणतन्त्रको रक्षा गरी भविष्यतर्फ अघि बढ्न सकिने बताएका छन्।
उनले भने, “लोकतन्त्र नै सबैभन्दा महत्वपूर्ण कुरा हो। उदारवादी र समाजवादी लोकतन्त्र एउटै रुखका दुई हाँगा हुन्।” भट्टराईका अनुसार, “हामीले एकअर्कालाई निषेध गर्नुभन्दा बरु सकारात्मक कुराहरू सिक्न र नकारात्मक पक्षलाई परित्याग गर्दै अघि बढ्नुपर्छ, जसले मात्र संघीय लोकतान्त्रिक गणतन्त्रको रक्षा गर्न सकिन्छ।”
नेता भट्टराईले अहिले विभिन्न प्रतिगामी शक्तिहरू सक्रिय भएको र उनीहरूले लोकतन्त्रवादी शक्तिहरूमा विभाजन ल्याउने प्रयास गरिरहेको उल्लेख गरे। “उनीहरूले राजनीतिक भेदभाव बढाउन खोजिरहेका छन्,” उनले भने। “वर्तमान जटिल भूराजनीतिक अवस्थाको पृष्ठभूमिमा, हामीले पार्टीगत र गुटगत सोचभन्दा पर पुगेर राष्ट्रिय हितलाई प्राथमिकता दिनु पर्छ र सहकार्य गर्नुपर्छ।”कार्यक्रमका सहभागीहरूले स्व. चन्द्रप्रसाद न्यौपानेको नेपाली राजनीतिमा योगदानको चर्चा गरेका थिए।
