काठमाडौंको बालाजु क्षेत्रबाट एटिएम तोडफोड गरिरहेको अवस्थामा एक युवकलाई प्रहरीले पक्राउ गरेको छ।
घटनास्थल काठमाडौं महानगरपालिका–१६ अन्तर्गतको बाइपास ओरालोमा राति करीब साढे १२ बजे प्रहरी टोली पुगेर युवकलाई नियन्त्रणमा लिएको हो।
कुमारी बैंकको एटिएम मेशिन तोडफोड भइरहेको सूचना पाएपछि प्रहरीले तत्काल प्रतिक्रिया जनाएको थियो।
पक्राउ पर्ने व्यक्ति नुवाकोटको विदुर नगरपालिका–१३ निवासी २९ वर्षीय ज्ञानेन्द्र ठकुरी हुन्, जो हाल माछापोखरी सडकछेउमा बस्दै आएका थिए।
जिल्ला प्रहरी परिसर काठमाडौंका प्रहरी उपरीक्षक (एसपी) अपिलराज बोहराका अनुसार ठकुरीले सिमेन्टको ब्लक प्रयोग गरी एटिएम मेसिन फुटाएका थिए।
पक्राउ परेपछि उनी मादक पदार्थ सेवन (मापसे) गरेको अवस्थामा रहेको समेत पुष्टि भएको छ।
