अमेरिकी अर्बपति उद्यमी एलन मस्कले शनिबार आफ्नो सामाजिक सञ्जाल प्लेटफर्म एक्स मार्फत ‘अमेरिका पार्टी’ नामक नयाँ राजनीतिक दलको स्थापना गरेका छन्, जसले अमेरिकी राजनीति क्षेत्रमा हलचल ल्याएको छ।
मस्कले देशको वर्तमान राजनीतिक अवस्था र दुई प्रमुख दलहरू—डेमोक्रेट र रिपब्लिकन—माथि कडा आलोचना गर्दै नयाँ विकल्पको आवश्यकता औंल्याएका हुन्। उनले लेखेका छन्, “आज ‘अमेरिका पार्टी’ सुरु हुँदैछ, ताकि तपाईंले आफ्नो स्वतन्त्रता फिर्ता पाउन सक्नुहोस्।”
स्वतन्त्रता दिवसको दिन, मस्कले एक्समा सार्वजनिक पोल राखेर दुई दलीय प्रणालीप्रति जनताको धारणा बुझ्न खोजे। सो पोलमा ६५.४ प्रतिशतले नयाँ दलको समर्थन गरे। मस्कले भने, “अमेरिका डेमोक्रेट र रिपब्लिकनको हातमा बर्बाद भइरहेको छ, अब नयाँ बाटो आवश्यक छ।”
पूर्व राष्ट्रपति ट्रम्पसँगको ‘बिग ब्यूटीफुल बिल’ बहसपछि मस्कले ट्रम्प प्रशासनबाट दूरी बनाइसकेका छन्। अब उनले राजनीतिमा नयाँ शक्ति प्रवेश गराएका छन्।
