काठमाडौँ । प्रधानमन्त्री केपी शर्मा ओली मध्य एसियाली देश तुर्कमेनिस्तानको भ्रमणमा जाने तयारी जुटेका छन् । उक्त देशको भ्रमणका जानका लागि आवश्यक तयारी भइरहेको प्रधानमन्त्री तथा मन्त्रीपरिषद् कार्यालय स्रोतले जनाएको छ ।
अगस्त ५–८ मा भूपरिवेष्टित विकासशील राष्ट्रहरूको तेस्रो सम्मेलन (एलएलडीसी थ्री) हुँदैछ । सोही कार्यक्रममा भाग लिन प्रधानमन्त्री अोली त्यहाँ जाने बताइएको छ ।
संयुक्त राष्ट्रसंघको विकासको लागि वित्तसम्बन्धी चौथो अन्तर्राष्ट्रिय सम्मेलनमा सहभागी भएर प्रधानमन्त्री अोली असार २० गते स्पेनबाट फर्केका थिए । स्पेनबाट फर्केपछि साउनको दोस्रो वा तेस्रो साता भारत भ्रमणमा जाने तयारी चलिरहेको थियो । तर अचानक तुर्कमेनिस्तानको भ्रमणमा जाने सूचना बाहिर आएको छ । प्रधानमन्त्री अोली तुर्कमेनिस्तान उड्ने मिति भने टुङ्गो लाग्न बाँकी छ ।
अहिले प्रधानमन्त्री कार्यालय र परराष्ट्र मन्त्रालय त्यसको तयारीमा लागेको छ । नेपालको लागि सो सम्मेलन निकै महत्त्वपूर्ण रहेकाले प्रधानमन्त्रीकै सहभागिता रहने गरी तयारी भइरहेको परराष्ट्र मन्त्रालयले जनाएको छ ।
एलएलडीसीमा नेपालसहित विश्वका ३२ वटा देश आबद्ध छन् । त्यसमध्ये सबभन्दा अफ्रिकाबाट १५ वटा देश छन् भने एसियाबाट १२ देश रहेका छन् । एसियाली मुलुकमा नेपालसहित अफगानिस्तान, आर्मेनिया, अजरबैजान, भुटान, कजाखस्तान, किर्गिस्तान, लाओस, मंगोलिया, ताजिकिस्तान, तुर्कमेनिस्तान र उज्वेकिस्तान रहेका छन् ।
