प्रधानमन्त्री केपी शर्मा ओलीले नेपाल प्रहरीलाई शासक होइन, जनताको सेवकको भूमिकामा काम गर्न निर्देशन दिएका छन्। जनकपुरधाममा मधेश प्रदेश प्रहरी कार्यालयको नवर्निर्मित भवन उद्घाटन समारोहमा सम्बोधन गर्दै उनले प्रहरीलाई न्यायसंगत र इमान्दारीपूर्ण रूपमा काम गर्नुपर्नेमा जोड दिए।
ओलीले भने, “राणा शासन र पञ्चायती व्यवस्थाको समयमा झूटो आरोप लगाएर मानिसलाई फसाउने र यातना दिने कार्य हुन्थ्यो, तर अहिले पनि केही तत्वहरूले अराजकता फैलाउने प्रयास गरिरहेका छन्। यसबाट सतर्क रहनुपर्छ।”
प्रधानमन्त्रीले अराजकता फैलाउने तत्वहरूले लोकतन्त्रमा कुनै योगदान नराख्ने भन्दै समाज र राष्ट्रले झूटो बोल्ने तत्वलाई सजाय दिनुपर्ने बताए। उनले नेपाली सेनाले राष्ट्र सुरक्षा जस्तै, नेपाल प्रहरीले पनि आफ्नो दक्षता र योग्यता प्रयोग गरेर जनतालाई इमान्दारीपूर्वक सुरक्षा र सेवा प्रदान गर्नुपर्ने बताए।
साथै, देशमा बढ्दो आपराधिक गतिविधि, चोरी–डकैती, लागुऔषध प्रयोग, सीमा क्षेत्रमा हुने तस्करी, मानव ओसारपसार र राजस्व चुहावट नियन्त्रणमा प्रहरी संगठनले गम्भीरता पूर्वक लाग्नुपर्ने उल्लेख गरे।
