अमेरिकाले देश निकाला गरेर चार्टर्ड विमानमार्फत काठमाडौँस्थित त्रिभुवन अन्तर्राष्ट्रिय विमानस्थल ल्याएर छाडिएका १९ नेपालीलाई प्रहरीको मानव बेचबिखन ब्युरोको जिम्मा लगाइएको छ ।
त्रिभुवन अन्तर्राष्ट्रिय विमानस्थल अध्यागमन कार्यालयले १७ जना पुरुष र २ जना महिलालाई आवश्यक सोधपुछपछि बिहीबार राती नै ब्युरोमा बुझाएको हो ।
अमेरिकाले ३७ जना नेपालीलाई देश निकाला गरी पठाउन लागेको जनाइए पनि बिहीबार भने १९ जनालाई मात्रै ल्याइएको हो।
अमेरिकाको अध्यागमन कानुन उल्लङ्घन गरेको आरोपमा नेपालीहरूलाई देश निकाला गरेको हो ।
अध्यागमन कार्यालयका अनुसार डोनाल्ड ट्रम्प दोस्रो पटक अमेरिकाको राष्ट्रपति चुनिएयता मात्रै अमेरिकाले २३४ नेपालीलाई देश निकाला गरिसकेको छ।
ब्युरोले त्यसरी फर्काइएका नेपालीहरूसँग सामान्य सोधपुछपछि परिवारको जिम्मा लगाएर छाड्ने गरेको छ ।
