जेनजी आन्दोलनको दबाबपछि भोटेकोशी गाउँपालिकाको एक जेनजी समूहले भोटेकोशी जलविद्युत् आयोजनाबाट १० प्रतिशत सेयर प्राप्त गरेको छ।
भोटेकोशी जेन-जी पब्लिक इन्भेष्टमेन्ट पब्लिक लिमिटेडको नाममा स्थानीयको समूहले ४५ मेगावाटको अपर भोटेकोशी जलविद्युत् आयोजनाको १० प्रतिशत शेयर माग्दै आयोजनाको कामकाज एक महिनादेखि बन्द गराएको थियो ।
आइतबार ‘भोटेकोशी पावर कम्पनी’ र ‘भोटेकोशी जेन–जी पब्लिक इन्भेष्टमेन्ट पब्लिक लिमिटेड’बीच भएको सम्झौतापछि आयोजना पुनः सञ्चालनमा आएको हो। सम्झौतामा जेनजी कम्पनीका अध्यक्ष फुर्पा शेर्पा र भोटेकोशी पावर कम्पनीका सचिव विश्वमोहन कर्माचार्य लगायतले हस्ताक्षर गरेका छन्।
स्रोतका अनुसार २० हजार स्थानीय सेयर सदस्य समेटिएको कम्पनीमार्फत १० प्रतिशत सेयर बिक्री गरिने र त्यसको भुक्तानी डिभिडेन्ड र बोनसबाट क्रमशः मिलाउने व्यवस्था गरिएको छ।
यसअघि पनि राजनीतिक दलका प्रतिनिधिको उपस्थितिमा स्थानीयलाई ६ प्रतिशत सेयर दिने सहमति भइसकेको थियो। तर भदौ २३–२४ गतेको जेनजी आन्दोलनपछि ‘भोटेकोशी जेनजी ग्रुप’ नामक समूहले आयोजना बन्द गर्दै १० प्रतिशत सेयर नि:शुल्क माग गरेको थियो।
कम्पनीले सेयर दिने तयारी त देखाए पनि नि:शुल्क दिन अस्वीकार गरेपछि लामो समय आयोजना ठप्प भएको थियो। अन्ततः आइतबार दुबै पक्षबीच सम्झौता भई २०७१ सालको पुरानो सम्झौतामा तोकिएको ६ प्रतिशत सेयरमा थप ४ प्रतिशत वृद्धि गरी कुल १० प्रतिशत कायम गर्ने सहमति भएको हो।
