काठमाडौं । भारत र श्रीलंकामा हुने टी-२० विश्वकप २०२६ को सुपर-८ चरणका टोलीहरू तय भएसँगै अन्तर्राष्ट्रिय क्रिकेट परिषद (आईसीसी) ले अर्को संस्करण (२०२८) का लागि छनोट हुने टोलीहरूको घोषणा गरेको छ।
अष्ट्रेलिया र न्यूजिल्याण्डमा संयुक्त रूपमा आयोजना हुने सन् २०२८ को टी-२० विश्वकपमा बंगलादेशले पनि आफ्नो स्थान सुरक्षित गरेको छ।
छनोटको मापदण्ड के छ?
आईसीसीका अनुसार सन् २०२६ को टी-२० विश्वकपको समूह चरण पार गरेर सुपर-८ मा पुग्ने टोलीहरूले सिधै २०२८ को विश्वकपका लागि छनोट पाएका छन्। यसरी सिधै छनोट हुने टोलीहरूमा भारत, वेस्ट इन्डिज, दक्षिण अफ्रिका, इंग्ल्याण्ड, श्रीलंका, न्यूजिल्याण्ड, जिम्बावे र पाकिस्तान रहेका छन्।
यसका साथै, सन् २०२८ को विश्वकप आयोजक राष्ट्र भएका नाताले अष्ट्रेलिया र न्यूजिल्याण्डले पहिले नै प्रतियोगितामा सिधै प्रवेश पाइसकेका छन्।
बंगलादेश र अन्य टोलीको अवस्था
बाँकी रहेका तीन स्थानका लागि आईसीसीको टी-२० वरीयतालाई आधार बनाइएको छ। आईसीसीका अनुसार २०२६ को मार्च ९ मा जारी हुने वरीयताका आधारमा थप तीन टोलीको घोषणा गरिनेछ।
हालको वरीयतालाई असर गर्ने गरी कुनै ठूला अन्तर्राष्ट्रिय खेलहरू तालिकामा नरहेकाले बंगलादेश, अफगानिस्तान र आयरल्याण्डले यी बाँकी तीन स्थानमा स्थान बनाउने पक्का देखिएको छ।
सन् २०२८ को टी-२० विश्वकपमा कुल २० टोलीले सहभागिता जनाउनेछन्। बाँकी रहेका ८ टोलीको टुंगो भने क्षेत्रीय छनोट खेलहरूका माध्यमबाट लाग्नेछ।
