काठमाडाैं । केपी शर्मा ओली नेतृत्वको तत्कालीन सरकारले संवैधानिक आयोगमा गरेका ५२ पदाधिकारीको नियुक्ति खारेज गर्न सर्वोच्च अदालतले अस्वीकार गरेको छ ।
संवैधानिक इजालाशमा भएको सुनुवाइपछि सर्वोच्च अदालतले ओलीले नेतृत्वको सरकारले गरेका नियुक्तिविरुद्ध अन्तरिम आदेश दिन अस्वीकार गरेको हो ।
बुधबार कामु प्रधानन्यायाधीश दीपककुमार कार्कीसहित न्यायाधीशहरु मीरा खड्का, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडासहितको संवैधानिक इजलासले यस्तो आदेश दिएपछि अख्तियार प्रमुखसहितका अन्य पदाधिकारीकाे पद जाेगिएकाे छ ।
ओली नेतृत्वको सरकारले उपस्थितको बहुमत पदाधिकारीले निर्णय गर्न सक्ने गरी संवैधानिक परिषदसम्बन्धी अध्यादेश ल्याएको थियो ।
सोही अध्यादेश बमोजिम संवैधानिक निकायमा पटक पटक गरी ५२ पदाधिकारी नियुक्ति सिफारिस गरेको थियो ।
अध्यादेश र नियुक्तिविरूद्ध अधिवक्ता ओमप्रकाश अर्याललगायतले छुट्टाछुट्टै रिट दिएका थिए ।
