राष्ट्रिय प्रजातन्त्र पार्टी (राप्रपा)का अनुशासन समिति अध्यक्षबाट हटाइएका नवराज सुवेदीले आफूविरुद्ध अन्याय भएको भन्दै निर्वाचन आयोगमा उजुरी दिएका छन्। तर, उनले यसले पार्टी नफुट्ने स्पष्ट पारेका छन्।
सुवेदीले आइतबार आयोग परिसरमा पत्रकारहरूसँग कुरा गर्दै आफूलाई पार्टीको सचिवालयमार्फत मात्र हटाइएको थाहा पाएको र कुनै औपचारिक जानकारी नदिइएको बताए। “मिडियाबाट मात्र थाहा पाएँ, मलाई हटाएर अरूलाई ल्याइएको रहेछ,” उनले भने।
उनले आफूले अनुशासन विपरीत कुनै गतिविधि नगरेको दाबी गर्दै अध्यक्ष लिङ्देनको एकल निर्णयविरुद्ध आवाज उठाउनु परेको बताए। सुवेदीले पार्टीको बलियो भविष्यको कामनाका साथ, आन्तरिक अन्याय रोक्न उजुरी दर्ता गरिएको जनाए।
यसैबीच, पूर्वप्रवक्ता सगुनसुन्दर लावतीले पनि आफूलाई पटक–पटक अन्यायपूर्वक हटाइएको भन्दै सुवेदीमार्फत निर्वाचन आयोगमा उजुरी दिएका छन्। उनले भने, “म त पार्टीको सिपाही हुँ, तर विगतमा पनि स्पष्ट नबताई मलाई हटाइयो, अहिले तेस्रोपटक यस्तो भयो।”
दुवै नेताले यो विवादले पार्टी नफुट्ने दृढता व्यक्त गर्दै आन्तरिक न्याय र पारदर्शिता सुनिश्चित गर्न आयोगको ढोका ढकढक्याइएको बताएका छन्।
