त्रिभुवन अन्तर्राष्ट्रिय विमानस्थल अनिश्चितकालका लागि रूपमा बन्द भएको छ । त्रिभुवन अन्तर्राष्ट्रिय विमानस्थल नागरिक उड्डयन कार्यालयले आज एक विज्ञप्ति जारी गर्दै अर्को सूचना जारी नहुन्जेल विमानस्थल बन्द गरिएको जनाएको हो ।
कार्यालयले उपत्यकामा जारी निषेधाज्ञा, कर्फ्यु आदेश, उपत्यकाभित्रको विषम परिस्थितिलगायत विमानस्थल वरपर विमान अवतरण मार्गमा देखिएको धुवाँलगायतले विमानको सुरक्षामा गम्भीर असर पर्न सक्ने भन्दै बन्द गर्नुपरेको जिकिर गरेको छ ।
“विमानस्थल बन्द रहेको अवस्थामा विमानस्थलमा नआइदिन पनि अनुरोध गरिएको छ । विमानस्थल खुलेको सूचना पाएपश्चात् सम्बन्धित वायुसेवा कम्पनीमा सम्पर्क गरेर मात्र आउन पनि विज्ञप्तिमार्फत आग्रह गरिएको छ,” विज्ञप्तिमा भनिएको छ ।
विमानस्थल अनिश्चितकालका लागि बन्द हुँदा आन्तरिक तथा अन्तर्राष्ट्रिय उडानका हवाई यात्रु अलपत्र परेका छन् ।
