काठमाडौँ । नेपाल र भारतको स्टार्टअपलाई जोड्ने नयाँ पहलका रूपमा ‘आईएन-स्प्यान’ नामक प्लेटफर्मले नेपाली उद्यमीहरूबाट आवेदन आह्वान गरेको छ।
यस पहलले रूपान्तरणकारी विचार भएका नेपाली उद्यमीहरूलाई सीमापार कार्यक्रममा सहभागी हुने अवसर दिएको छ।
आईएन-स्प्यानले आईआईटी मद्रास प्रवर्तकको सहकार्यमा आईआईटी मद्रासमा ८ हप्ताको पूर्ण-वित्त पोषित तालिम र नवप्रवर्तन कार्यक्रम सञ्चालन गर्नेछ। यो कार्यक्रममा सहभागी हुने उद्यमीहरूले विशेषज्ञहरूको मार्गदर्शन, प्रयोगात्मक सिकाइ र इन्टर्नसिपको अवसर पाउनेछन् ।
यसले उनीहरूको विचारलाई मूर्तरूप दिन मद्दत गर्ने अपेक्षा गरिएको छ। आईआईटी मद्रास प्रवर्तक एक अग्रणी इन्क्युबेटर हो, जसले ४६ वटा स्टार्टअपलाई सहयोग गरिसकेको छ।
यसअघिका भारत-नेपाल स्टार्टअप पहलहरूको सफलतालाई निरन्तरता दिँदै, आईएन-स्प्यानले नेपाली स्टार्टअपहरूलाई भारतको शीर्ष नवप्रवर्तन केन्द्रहरूमध्ये एकमा परामर्श, तालिम र उद्योग एक्सपोजर प्राप्त गर्ने मौका प्रदान गरेको छ।
कार्यक्रमका लागि आवेदनहरू २०८२ कात्तिक १५ देखि २९ गतेसम्म (नोभेम्बर १–१५, २०२५) खुला गरिएको छ। इच्छुक उद्यमीहरूले अनलाइन माध्यमबाट आवेदन दिन सक्नेछन्।
