काठमाडौं । हलिउड अभिनेत्री जेनिफर लरेन्सले जीवनमा डर लागेको क्षणका विषयमा बताएकी छिन् । एक अन्तर्वार्ताका क्रममा जेनिफरले आफ्नो नग्न तस्वीर ह्याकरले इन्टरनेटमा लिक गराएको घटनामा आफू सधैँ दुःखी भइरहने बताएकी हुन् ।
सन् २०१४ मा उनको निजी तस्विर इन्टरनेटमा लिक भएको थियो । अन्तर्वार्ताका क्रममा उनले भनेकी छन्, ‘मेरो सहमति विना कसैलाई पनि मेरो नग्न तस्विर हेर्ने अधिकार छैन । त्यो घटना सधैँ मेरो मनभित्र गढेको छ ।’
जेनिफरले सन् २०१७ मा आफ्नो घर लुइसभिल्लेबाट न्युयोर्क जाँदा आफ्नो निजी विमानको इन्जिन फेल हुँदा अत्यन्तै डराएको पनि बताएकी छिन् । उनी हरेक पटक विमानमा सवार हुँदा त्यही घटनाको याद आउने बताउँछिन् ।
जेनिफरका अनुसार उनको निजी विमान घर लुइसभिल्लेबाट न्युयोर्क गइरहेको थियो । आकाशमा उडिरहेको बेला विमानमा जोडदार आवाज आएको र चालकले इन्जिन खराब भएको भन्दा आफू एकदमै डराएको उनले बताइन् । त्यतिबेला विमानलाई नियागरा अन्तर्राष्ट्रिय विमानस्थलमा आकस्मिक अवतरण गराइएकाे थियाे ।
