काठमाडौं । साइकल तथा ठेलागाढामा व्यवसाय गर्न प्रतिबन्ध लगाउने काठमाडौं महानगरपालिकाको सूचनामा ‘क्लिन एअर नेटवर्क नेपाल’ (सीएएनएन)को ध्यानाकर्षण भएको छ ।
महानगरपालिकाले पुस २६ गते प्रकाशित गरेको सूचनामा सीएएनएनले मंगलबार विज्ञप्ति जारी गरी गम्भीर ध्यानाकर्षण भएको जनाएको हो ।
साइकल तथा ठेलागाढाजस्ता वातावरणमैत्री सवारीसाधनको प्रयोग प्रोत्साहनयोग्य भएको उल्लेख गरी सीएएनएनद्वारा विज्ञप्तिमा भनिएको छ, यस्ता सवारीसाधन प्रयोगमा ल्याएर आयआर्जन गर्न प्रतिबन्ध लगाए मानिसहरु बेरोजगार हुनेदेखि उनीहरुको परिवारको पालनपोषणमा समस्या निम्तिने छ । यसको दीगो व्यवस्थापन गर्न जरुरी छ ।
सीएएनएनले महानगरपालिकालाई यो निर्णयमा निषेधात्मक नभइ उचित व्यवस्थापन गर्न अनुरोध पनि गरेको छ । विज्ञप्तिमा भनिएको छ, ‘साइकल तथा ठेलागाढा प्रयोग गरी व्यापार आयआर्जन गर्नु, सहरको वायुप्रदूषण न्यूनीकरण र महानगरको आर्थिक स्थितिको एक हिस्सा हो । यसमा निषेधात्मक नभइ उचित व्यवस्थापन जरुरी छ ।’
काठमाडौं महानगरपालिकाले गएकाे पुस २६ गते साइकल र ठेलागाडामा व्यापार गर्न प्रतिबन्ध लगाएको सूचना प्रकाशित गरेकाे थियाे ।
सडकपेटीमा अनधिकृत रुपमा व्यापार व्यवसाय गर्ने, निजी प्रयोगका सामग्रीहरु राख्ने, ठेलागाडा वा साइकलमा सामान राखी व्यापार/व्यवसाय गर्नेलगायतको कार्य गरी सार्वजनिक आवागमनमा अनधिकृत रुपमा बाधा अवरोध पुगेको महानगरको सूचनामा उल्लेख गरिएकाे छ ।
