काठमाडौं । सरकार छाड्ने निर्णय गरेका राष्ट्रिय स्वतन्त्र पार्टीका सभापति रवि लामिछानेले आफूलाई खासगरी मिडियाले नै चारैतिरबाट प्रहार गरेको बताएका छन् ।
आइतबार पार्टीकाे बैठकपछि पत्रकार सम्मेलन गरेका लामिछानेले भने, ‘मेरो अपराध केही छैन, १२ भाइ सम्पादकले चौतर्फी प्रहार गरे ।’
रविले केही मिडिया र सम्पादकको नाम लिएर क्षमता भए आफूविरुद्ध चितवनमा चुनाव लड्न आउन चुनौतीसमेत दिए ।
उनले सम्पादकहरुले मिटिङ गरेर ‘सिध्याउने हिसाब’ले आधारबिहीन समाचार लेखेकाे जिकीर गरे ।
पत्रपत्रिका र अनलाइन सञ्चारमाध्यमप्रति निकैबेर खनिएका उनले विभिन्न समयमा छापिएका समाचारका उदाहरण प्रस्तुत गर्दै सञ्चारमाध्यम र तिनका मालिकहरूले गलत गर्दा पनि पत्रकारहरूले लेख्न नसकेको बताए ।
गृहमन्त्रालय आफ्नो भागमा परेको र पार्टीले पठाएको मान्छे गृहमन्त्री हुने आफूहरूले बताइरहँदा पनि सञ्चारमाध्यमहरूले गलत समाचार लेखेको उनले बताए ।
पटक–पटक मिडिया सञ्चालकहरूको नाम लिएर लामिछाने उनीहरूप्रति पोखिइरहे । देशमा कानूनी शासन भएको भन्दै उनले कानून सबैलाई बराबर भएको पनि बताए ।
