काठमाडाैं । सन् २०१९ काे नाेभेम्बरमा अमादब्लम हिमालमा कुवेतको झण्डा राखिएको विवाद यतिबेला नेपालको संसदमा चर्चामा छ । गोरखाबाट निर्वाचित सांसद राजेन्द्र बजगाईँले कीर्तिमानी आरोही निर्मल पूर्जा अर्थात् निम्सदाई माथि आरोप लगाएर उनीमाथि नेपालमा प्रतिबन्ध नै लगाउनुपर्ने माग राख्दै आएका छन् । उनले यतिमात्र नभएर पूर्जामाथि हिमाल आरोहणका क्रममा भएका विविध अपुष्ट आरोप पनि लगाइरहेका छन् ।
यद्यपी, उनको आरोप प्रतिशोधपूर्ण भएको पूर्जाको प्रतिक्रिया छ । सांसद बजगाईँ पर्यटन व्यवसायीसमेत भएकाले उनले प्रतिशोधपूर्ण आरोप लगाइरहेको पूर्जा बताउँछन् ।
सन् २०१९ को नोभेम्बरमा नेपालको आमादब्लम हिमालको चुचुरोको एउटा ठूलो हिस्सा ढाकिने गरी कुवेतको झण्डा राखिएपछि विवाद उत्पन्न भएको थियो । सामाजिक सञ्जालमा उक्त भिडिओ भाइरल भएपछि बौद्धिक जगतबाट आलोचना भएको थियो ।
‘सेभेन समिट’ मार्फत अमादब्लम गएका कुवेती टोलीले उक्त झण्डा त्यहाँ फहराएको थियो । उक्त टोलीलाई पूर्जाको टोलीले सहयोगमात्र गरेको थियो । करिब १५० किलोग्राम तौल भएको उक्त झण्डा त्यहाँ फहराउनका लागि निकै कठीन भएकाले आफूले सहयोगमात्र गरेको पूर्जा बताउँछन् । तर सांसद बजगाईँले उक्त झण्डा पूर्जाले लगेजसरी उनीमाथि प्रतिबन्धको माग उठाइरहेका छन् ।
वास्तवमा पूर्जा सहयोगी स्वभावका छन् । आरोहणमा छँदा उनी र उनका सहयोगी समस्यामा परेका अन्य पर्वतारोहीलाई उद्धार गर्छन् । उनले आफ्नो रेकर्ड ब्रेकको अवस्थामा पनि समस्यामा परेका कयौँ मानिसहरुलाई उद्धार गरेको दृष्टान्त छन् ।
कुवेतको सबैभन्दा ठूलो आकारको झण्डा दाबी गरेर ‘असम्भव काम सम्भव’ गराइएको भनिए पनि त्यसलाई एउटा जोखिमपूर्ण कामको रूपमा धेरैले औँल्याएपछि पर्यटन मन्त्रालयले झण्डा जफत गरेको थियो । पछि उक्त झण्डा कुवेत फिर्ता पठाइयो ।
उक्त झण्डासहित कुवेती टोली सेभेन समिटमार्फत आएका थिए । पछि कुटनीतिक तहबाट झण्डा फिर्ता पठाउने निर्णय भएपछि सेभेन समिटमार्फत नै झण्डा पठाइएको थियो ।
१ सय मिटर लम्बाइ र ३० मिटर चौडाइ भएको करिब १ सय ५० किलोग्रामको झण्डा जफत गरिएपछि डेढवर्षसम्म भृकुटीमण्डपस्थित पर्यटन विभागको स्टोरमा राखिएको थियो । २०७७ माघ १८ गते तत्कालीन पर्यटनमन्त्री भानुभक्त ढकालले मन्त्रीस्तरीय निर्णयबाट उक्त झण्डा नेपाल पर्वतारोहण संघ (एनएमए) मातहको पोखरास्थित अन्तर्राष्ट्रिय पर्वतीय संग्रहालयमा सजाउने निर्णय गरेका थिए । त्यसपछि झण्डा पोखरास्थित संग्रहालयमा पठाइएको थियो । तर लगत्तै पर्यटन मन्त्रायलये झण्डा फिर्ता मागेर सेभेन समिटलाई झण्डा फिर्ता गर्न भनेको थियो ।
