निर्माणाधीन संसद भवनको काम छिटो सक्न ध्यानाकर्षण

काठमाडौं । राष्ट्रिय सभाको सार्वजनिक नीति तथा प्रत्यायोजित विधायन समितिले सिंहदरबारमा निर्माणाधीन संसद भवनको कार्य प्रगति विवरणबारे सहरी विकास मन्त्रालयसँग छलफल गरेको छ ।

सिंहदरबारस्थित समितिको कार्यकक्षमा बसेको बैठकमा सांसदहरुले संसद भवन निर्माण सम्पन्न गर्न सरकारले निर्माण कम्पनीको ध्यानाकर्षण गराउनुपर्ने धारणा राखेका छन् ।
सांसद नरबहादुर बिष्टले भवनको डिजाइनका सन्दर्भमा अख्तियारबाट पटक पटक चिठी आउने र कर्मचारी तथा निर्माण कम्पनी डराउने भएका कारण निर्माणमा ढिलाई भइरहेको बताए ।

उनले भने, ‘पूराना वस्तुकला अनुसार डिजाइन गर्दैगर्दा अख्तियारबाट पटक पटक चिठी आउने र निर्माण कम्पनी पनि डराउने अनि कर्मचारी पनि डराउने कारणले निर्माणमा ढिलाई भएको हो कि ?’, उनको प्रश्न थियो ।

आयोजनाहरु निर्माणका क्रममा अदालतमा दर्ता भएका मुद्दाहरुको छिटो निरुपण नहुनुको कारण समेत विकास निर्माणमा ढिलाइ भइरहेको बताए ।

समिति सभापति माया प्रसाद शर्माले छिटोभन्दा छिटो नयाँ भवन बनाउन आग्रह गर्दै छिट्टै नयाँ संसद भवनमा समिति बैठक बसाउन पाउने विश्वास व्यक्त गरे ।

© 2024 All right reserved Site By : Himal Creation || सूचना विभाग दर्ता नं : ४१२१–२०८०/२०८१