काठमाडौं। शिक्षक तथा कर्मचारीहरूको आन्दोलनका कारण माध्यमिक शिक्षा परीक्षा (एसईई) को उत्तरपुस्तिका परीक्षणमा ढिलाइ हुने भएको छ।परीक्षा नियन्त्रक गणेश भट्टराईका अनुसार उत्तरपुस्तिकाहरू परीक्षण केन्द्रमा राखिएका छन्, तर शिक्षकहरूले कपी जाँच्न जानसकेका छैनन्।
“उत्तरपुस्तिका परीक्षण केन्द्रमा राखिएका छन्, शिक्षकहरू अझै आउने प्रयासमा छन्,” परीक्षा नियन्त्रक भट्टराईले भने, “उत्तरपुस्तिका परीक्षण शिक्षकको जिम्मेवारी हो, अरू व्यक्तिहरूले यसलाई गर्न सक्दैनन्।” उनले विद्यार्थीहरूको भविष्य उत्तरपुस्तिकासँग जोडिएको उल्लेख गर्दै, शिक्षकहरूले छिट्टै कपी जाँच्न आउने विश्वास व्यक्त गरे। “हामीलाई विश्वास छ कि शिक्षकहरू छिट्टै फर्कनुहुन्छ,” उनले थपे।
एसईई परीक्षा ७ चैतदेखि सञ्चालन भएको थियो। परीक्षामा नियमिततर्फ ४ लाख ३१ हजार ४६६ र ग्रेडवृद्धितर्फ ६७ हजार ७१५ गरी जम्मा ४ लाख ९९ हजार १८३ विद्यार्थीहरू सहभागी थिए। राष्ट्रिय परीक्षा बोर्डले एसईईको नतिजा असारको पहिलो साता सार्वजनिक गर्ने योजना बनाएको थियो। तर, शिक्षकहरूको आन्दोलनका कारण उत्तरपुस्तिका परीक्षणमा ढिलाइ हुँदा नतिजा प्रकाशित हुन ढिलो हुने संभावना देखिएको छ।
शिक्षक महासंघले शिक्षक–कर्मचारी मैत्री विद्यालय शिक्षा ऐन जारी गर्नका लागि २० चैतदेखि काठमाडौंमा आन्दोलन गर्दै आएको छ। शिक्षक–कर्मचारीहरूले विद्यालयहरूमा हड्ताल गर्दै आन्दोलनमा सहभागिता जनाउँदा सरकारी विद्यालयहरूमा नयाँ भर्ना अभियान रोकिएको छ। यसका कारण वार्षिक परीक्षाको नतिजा प्रकाशित गर्नु, एसईईको उत्तरपुस्तिका परीक्षण, र अन्य शैक्षिक गतिविधिहरू प्रभावित भएका छन्।मंगलबार बेलुका बसेको मन्त्रिपरिषद बैठकले शिक्षक–कर्मचारीका माग पूरा गर्ने प्रतिबद्धता जनाउँदै आन्दोलन समाप्त गरेर विद्यालय फर्कन आग्रह गरेको थियो। त्यसै गरी, शिक्षकका माग सम्बोधन गर्न वैशाख १२ देखि संसदको बर्खे अधिवेशन आह्वान गर्ने निर्णय पनि गरिएको थियो।
तर, सरकारले बारम्बार आश्वासन मात्र दिएको र शिक्षा ऐन जारी नभएसम्म आन्दोलन रोक्ने निर्णय नगरेको भन्दै शिक्षक महासंघले आन्दोलन जारी राख्ने जनाएको छ। महासंघकी सहअध्यक्ष नानुमाया पराजुलीले ऐन जारी हुने ग्यारेन्टी नभएको बताइन्। “सरकारले ऐन जारी गर्ने भन्यो, तर त्यसको प्रक्रिया कहिले पूरा हुनेछ थाहा छैन,” उनले भनिन्।आन्दोलनको नेतृत्व गरिरहेको महासंघले आन्दोलन निर्णायक मोडमा पुगेको दावी गर्दै थप शिक्षक–कर्मचारीलाई काठमाडौंमा केन्द्रित भएर आन्दोलनको दबाब बढाउन आह्वान गरेको छ।यदि आन्दोलनको समाधान नहुने हो भने, एसईई र कक्षा १२ को परीक्षा समेत प्रभावित हुने निश्चित छ।
