राजावादी संगठन शिव सेना नेपालका अध्यक्ष अनिल बस्नेतलाई प्रहरीले काठमाडौंको सुकेधाराबाट पक्राउ गरेको छ।
जिल्ला प्रहरी परिसर, काठमाडौंका प्रवक्ता एसपी अपिलराज बोहोराका अनुसार तीनकुने घटनासँग सम्बन्धित पक्राउ पूर्जीका आधारमा बस्नेतलाई नियन्त्रणमा लिइएको हो। यद्यपि, उनी कुन आरोपमा संलग्न छन् भन्नेबारे स्पष्ट विवरण नआएको प्रहरीले जनाएको छ।
गत चैत १५ गते काठमाडौंको तीनकुनेमा राजसंस्थाको पुनःस्थापनाको मागसहित भएको प्रदर्शनमा शिव सेना नेपालको सक्रिय सहभागिता थियो। उक्त प्रदर्शनमा ज्ञानेन्द्र शाहप्रति समर्थन जनाउने नारासहित भीड उत्रिएको थियो।
शिव सेना नेपालले लामो समयदेखि हिन्दू राष्ट्र पुनःस्थापनाको माग गर्दै शान्तिपूर्ण तर सुसुप्त गतिविधि गर्दै आएको छ। पूर्वराजा शाहका सार्वजनिक कार्यक्रममा पहिलो सुरक्षा घेरामा देखिने यो समूहले गणतन्त्रको खुला विरोध गर्दै हिन्दूत्वको प्रवर्द्धनलाई आफ्नो एजेन्डा बनाउँदै आएको छ।
