काठमाडौं । नेपाल कम्युनिष्ट पार्टी (एमाले) ले एक जिल्ला र १३ वटा जनसङ्गठनको अधिवेशन अझै सम्पन्न गर्न बाँकी रहेको जनाएको छ।
पार्टीका केन्द्रीय निर्वाचन आयोगका अध्यक्ष डा. विजय सुब्बाले भनेअनुसार, निर्धारित समयभन्दा ढिलो भइ चित्तबुझ्दो अधिवेशन सम्पन्न गर्न धनुषा जिल्ला र अन्य १३ जनसङ्गठनको अधिवेशन यही महिनाभित्र सम्पन्न गरिने छ।
पार्टीको आन्तरिक व्यवस्थाअनुसार, विसं २०८१ जेठ महिनाभित्र सबै जिल्लाका अधिवेशन सम्पन्न गर्नु पर्ने भनिए पनि धनुषाको अधिवेशन अझै पूरा हुन सकेको छैन। यसअघि वैशाख २० देखि २३ गतेसम्म अधिवेशन सुरु भए पनि विवादका कारण त्यो रोकिएको थियो।
डा. सुब्बाले धनुषाको अधिवेशन आगामी जेठ ७ गतेको लागि तय गरिएको जानकारी दिए। ‘हामी ७ गतेबाट निर्वाचन प्रक्रिया सुरु गर्नेछौं’, उनले भने।यस्तै, एमालेले जनसङ्गठनको महाधिवेशन गत चैत मसान्तसम्म सम्पन्न गर्न निर्देशन दिए पनि नौ वटा मात्र महाधिवेशन सम्पन्न भएका छन्।
अनेरास्ववियु, राष्ट्रिय युवा सङ्घ, अखिल नेपाल महिला सङ्घ, नेपाल किसान महासङ्घ, नेपाल खेलकुद महासङ्घ र राष्ट्रिय स्वास्थ्यकर्मी महासङ्घ जस्ता जनसङ्गठनहरूको महाधिवेशन भने अझै बाँकी रहेको डा. सुब्बाले बताए। ती जनसङ्गठनहरूको महाधिवेशन जेठ महिनाभित्र सम्पन्न गर्ने कार्यतालिका पनि प्रकाशित गरिसकिएको छ।
