काठमाडौं । राष्ट्रिय स्वतन्त्र पार्टी (रास्वपा) का सांसद गणेश पराजुलीले सभामुखमाथि सदनमा सत्तापक्षलाई बोल्न दिन विपक्षीसँग बार्गेनिङ गरेको आरोप लगाएका छन्।
भिजिट भिसा प्रकरणमा संलग्न गृहमन्त्री रमेश लेखकको राजीनामाको माग गर्दै विपक्षी दलहरूद्वारा संसद अवरुद्ध भइरहेका बेला सभामुखले दलीय सहमतिमा मात्रै बोल्न दिने निर्णय गरेका थिए। तर आजको बैठकमा प्रतिपक्षलाई बोल्न नदिइएपछि सांसद पराजुलीले त्यसप्रति आपत्ति जनाए।
संसद् बैठक स्थगित भएपछि पत्रकारहरूसँग कुरा गर्दै पराजुलीले भने, ‘सार्वभौम सदनमा जनताको आवाज लिएर आएका प्रतिपक्षी सांसदहरूलाई बोल्न नदिइयो। सभामुखले सत्तापक्षलाई बोल्न दिने भए मात्रै दिने, नभए नदिने भनेर बार्गेनिङ गरे, जुन दुर्भाग्यपूर्ण र लज्जास्पद हो।’
उनले प्रतिपक्षले सदनमा बोल्ने अधिकार सुनिश्चित हुनुपर्ने बताउँदै, माग पूरा नहुन्जेल संसद् चल्न नदिने अडान दोहोर्याए। ‘हाम्रो माग यथावत् छ — गृहमन्त्रीको राजीनामा र घटनाको छानबिन गर्न उच्चस्तरीय आयोगको गठन। यिनै बिना सदन चल्न दिँदैनौं,’ उनले भने।
