आइतबार दिल्लीको इन्दिरा गान्धी अन्तर्राष्ट्रिय विमानस्थलमा एउटा अनौठो र आश्चर्यजनक घटना भयो। अफगानिस्तानबाट आएका एक १३ वर्षीय बालक विमानको सिटमा बसेर होइन, बरु त्यसको चक्का राख्ने ठाउँ (ल्यान्डिङ गियर) मा लुकेर दिल्ली आइपुगे। यो देखेर विमानस्थलका अधिकारीहरू चकित परेका छन्।
आइतबार बिहान करिब ११ बजे केएएम एयरको विमान काबुलबाट डेढ घण्टाको उडानपछि दिल्लीमा अवतरण भएको थियो। १३ वर्षीय ती बालक ३० हजार फिटको उचाइमा ९४ मिनेटसम्म जीवित रहेको पाइएको भारतीय सञ्चारमाध्यम हिन्दुस्तान टाइम्सले जनाएको छ ।
जब विमान अवतरणपछि गुड्दै थियो, एयरलाइनका एक सुरक्षा अधिकारीले विमान नजिकै एउटा बालकलाई हिँडिरहेको देखे। उनले तत्कालै विमानस्थलको सुरक्षा टोलीलाई खबर गरे।
सुरक्षाकर्मीहरूले ती बालकलाई तुरुन्तै नियन्त्रणमा लिएर सोधपुछ गरे। बालकले आफू अफगानिस्तानको कुन्दुज प्रान्तको भएको र काबुल विमानस्थलमा कसैले नदेख्ने गरी लुकेर छिरेको बताए। त्यसपछि उनी उड्न तयार रहेको विमानको पछाडिपट्टिको चक्का राख्ने खाली ठाउँमा चढेर बसेको उनले स्वीकार गरे।
विमानको चक्का राख्ने ठाउँमा यात्रा गर्नु ज्यादै खतरनाक हुन्छ। जब विमान आकाशमा हजारौं फिट माथि उड्छ, त्यहाँ ज्यानै जमाउने चिसो हुन्छ र सास फेर्नका लागि अक्सिजनको पनि एकदमै कमी हुन्छ। यस्तो अवस्थामा अधिकांश मानिसको चिसोले वा अक्सिजनको कमीले मृत्यु हुन्छ। तर, भाग्यले यी बालक भने बाँच्न सफल भए।
सोधपुछपछि ती बालकलाई सोही दिन साँझ ४ बजे अर्को विमानबाट काबुल फिर्ता पठाइयो। पछि विमानको जाँच गर्दा चक्का राख्ने ठाउँमा एउटा रातो रङको स्पिकर फेला परेको थियो, जुन ती बालककै भएको मानिएको छ।
यस्ता घटनाहरू संसारमा कहिलेकाहीँ हुने गर्छन्। यसअघि पनि ज्यान जोखिममा राखेर केही मानिसहरूले विमानको ल्यान्डिङ गियरमा लुकेर यात्रा गर्ने प्रयास गरेका छन्, जसमध्ये धेरैजसोको मृत्यु भएको छ।
