काठमाडौँ । बलिउड अभिनेता रणवीर सिंह अभिनित धुरन्धर-२ ले रिलिजको पहिलो दिन कीर्तिमानी कमाई गरेको छ । फिल्मले रिलिजको पहिलो दिन ९७ करोड भारु कमाई गरेर नयाँ कीर्तिमान बनाएको हो ।
यसअघि बलिउडमा पहिलो दिन धेरै कमाई गर्ने कीर्तिमान शाहरुख खानको फिल्म जवानको नाममा रहेको थियो । २०२३ मा रिलिज भएको जवानले पहिलो दिन ७५ करोड कमाई गरेको थियो ।
बलिउड फिल्म विश्लेषकहरुले धुरन्धर-२ ले पहिलो दिन ९७ करोड नेट कलेक्सन र पेड प्रिभ्युबाट ४७ करोड गरेर १४४ करोड भारु कमाई गरेको उल्लेख गरेका छन् ।
त्यस्तै, धुरन्धर- २ ले भारत बाहिर पनि पहिलो दिन शानदार कमाई गरेको छ । फिल्म पहिलो दिन भारत बाहिर ६४ करोड कमाई गरेको छ । यसरी यस फिल्मले पहिलो दिन २०० करोड भन्दा बढी कमाई गरेको छ ।
धुरन्धर- २ फिल्म ३ घण्टा ४९ मिनेटको रहेको छ । जुन बलिवुडको सबैभन्दा दोस्रो लामो फिल्म भनिएको छ । यसअघिको सबैभन्दा लामो फिल्म जेपी दत्ताको २००३ मा रिलिज भएको फिल्म एलओसी कारगिल ४ घण्टा १५ मिनेट लामो थियो ।
धुरन्धर २ मा रणवीर सिंह, अर्जुन रामपाल, संजय दत्त र आर. माधवनले अभिनय गरेका छन् । आदित्य धरले फिल्म लेखेका छन् र निर्देशन गरेका छन् । त्यस्तै, फिल्मको निर्माण पनि उनले नै गरेका हुन् । यो फिल्म जियो स्टुडियोद्वारा प्रस्तुत गरिएको हो र बि ६२ स्टुडियोको ब्यानरमा निर्माण गरिएको हो ।
धुरन्धरको पहिलो भागले ८३६ करोड कमाई गरेर बलिउडकै अहिलेसम्मको सर्बाधिक कमाई गर्ने फिल्म बनेको थियो । फिल्मले विश्वभर लगभग १३ सय करोड भारु कमाएको थियो ।
