काठमाडौं । अमेरिका र इजरायलको आक्रमणपछि इरानले आफ्नो छिमेकी खाडी मुलुकहरूमा रहेका अमेरिकी सैन्य अड्डाहरूलाई निशाना बनाउन सुरु गरेको छ।
इरानले क्षेप्यास्त्र प्रहार गरेका साउदी अरब, कतार, यूएई र कुवेत जस्ता देशहरूसँग पनि आधुनिक र बलियो सैन्य क्षमता छ। यद्यपि, यी देशहरूले अहिलेसम्म इरानमाथि कुनै जवाफी सैन्य कारबाही भने गरेका छैनन्।
१. साउदी अरब: खाडीको सबैभन्दा ठूलो शक्ति
खाडी क्षेत्रमा साउदी अरबसँग सबैभन्दा ठूलो र आधुनिक सेना छ। सन् २०२४ मा साउदीको वार्षिक रक्षा बजेट ८०.३० अर्ब डलर थियो। ‘ग्लोबल फायरपावर इन्डेक्स २०२६’ अनुसार १४५ देशमध्ये साउदी २५औँ स्थानमा छ।
साउदीको वायुसेना निकै शक्तिशाली मानिन्छ। यससँग ३०० भन्दा बढी एफ-१५ स्ट्राइक ईगल र यूरोफाइटर टाइफुन जस्ता लडाकु विमान छन्।
साउदीसँग ‘पिस सिल्ड’ नामक अत्याधुनिक एयर डिफेन्स सिस्टम छ। यद्यपि, साउदी आफ्नो हतियार र प्रविधिका लागि अमेरिका, बेलायत र फ्रान्समाथि निर्भर छ।
२. संयुक्त अरब इमिरेट्स (यूएई): प्रविधिमा अब्बल
इरानले यूएईको दुबईमा कैयौँ हमला गरेपछि त्यहाँ ठूलो क्षति भएको छ। यूएई ग्लोबल फायरपावर इन्डेक्समा ५४औँ स्थानमा छ र यसको वार्षिक रक्षा बजेट २२.७५ अर्ब डलर छ।
यूएईसँग ६३ हजार तालिमप्राप्त सैनिक र ‘प्याट्रियट’ तथा ‘थाड’ जस्ता अत्याधुनिक रक्षा प्रणाली छन्। यसको वायुसेनामा एफ-१६ र मिराज २००० जस्ता विमानहरू सामेल छन्।
३. कतार: सानाे तर रणनीतिक रूपमा महत्त्वपूर्ण
विश्वको ठूलो ग्यास उत्पादक देश कतार ग्लोबल फायरपावर इन्डेक्समा ७१औँ स्थानमा छ। हालै इरानले कतारको ग्यास खानी र अमेरिकी सैन्य अड्डा ‘अल उदैद’ मा हमला गरेको थियो।
कतारको रक्षा बजेट १५.४१ अर्ब डलर छ। यससँग राफाल र यूरोफाइटर टाइफुन जस्ता अत्याधुनिक विमान छन्।
कतारको मुख्य चुनौती भनेको यसको सानो जनसंख्या हो, जसका कारण यो विदेशी विज्ञ र करारका सैनिकहरूमा बढी निर्भर छ।
४. कुवेत: मजबुत अर्थतन्त्र र सैन्य साझेदारी
कुवेत ग्लोबल फायरपावर इन्डेक्समा ७६औँ स्थानमा छ र यसको रक्षा बजेट ७.७९ अर्ब डलर छ। कुवेतमा १८ देखि ३५ वर्षका पुरुषहरूका लागि अनिवार्य सैन्य सेवा लागू गरिएको छ।
कुवेतसँग ३६७ ब्याटल ट्याङ्क र १३१ विमान छन्। यसले अमेरिका र बेलायतसँगको रक्षा साझेदारीबाट आफ्नो शक्ति बढाएको छ।
५. बहराइन: अन्तर्राष्ट्रिय सहयोगको केन्द्र
बहराइन ग्लोबल फायरपावर इन्डेक्समा ७५औँ स्थानमा छ। यसको आफ्नै सेना सानो भए तापनि रणनीतिक रूपमा यो निकै महत्त्वपूर्ण छ।
बहराइनमा अमेरिकाको पाँचौँ नौसैनिक बेडा (फिफ्थ फ्लीट) रहेको छ, जसले यसलाई मध्यपूर्वमा अमेरिकाको प्रमुख सैन्य केन्द्र बनाउँछ। बहराइनसँग एफ-१६ फाइटिङ फाल्कन लडाकु विमानहरू छन्।
– बीबीसी हिन्दीको सहयोगमा ।
