काठमाडौँ ।अर्थ मन्त्रालयले चालु आर्थिक वर्ष अमेरिकी डलरसँग नेपाली रुपैयाँ ५.७ प्रतिशतले अवमूल्यन हुने अनुमानको आधारमा प्रतिव्यक्ति कुल गार्हस्थ्य उत्पादन घटेर १ हजार ५१३ अमेरिकी डलर रहने अनुमान गरेको छ । गत आर्थिक वर्ष प्रतिव्यक्ति कुल गार्हस्थ्य उत्पादन १ हजार ५१६ अमेरिकी डलर रहेको थियो।
गत आर्थिक वर्ष प्रतिव्यक्ति कुल गार्हस्थ्य उत्पादन (प्रचलित मूल्यमा) रु.२ लाख ६ हजार ६२५ रहेकोमा चालु आर्थिक वर्ष ५.५ प्रतिशतले वृद्धि भई रु.२ लाख १७ हजार ९४६ पुग्ने अनुमान छ । पछिल्लो दशक प्रतिव्यक्ति कुल गार्हस्थ्य उत्पादनको वार्षिक औसत वृद्धिदर ८.८ प्रतिशत रहेको छ ।
आर्थिक क्रियाकलापमा आएको शिथिलता, न्यून आर्थिक वृद्धि लगायतका कारणले प्रति व्यक्ति कुल गार्हस्थ्य उत्पादनको वृद्धिदर न्यून रहेको रहेको उल्लेख गरिएको छ ।
आर्थिक वर्ष २०८२/८३ मा प्रतिव्यक्ति राष्ट्रिय आय र प्रतिव्यक्ति कुल राष्ट्रिय खर्चयोग्य आय दुवैमा सामान्य वृद्धि भएको छ । चालु आर्थिक वर्ष प्रतिव्यक्ति कुल राष्ट्रिय आय ५.७ प्रतिशतले वृद्धि हुने अनुमान छ । गत आर्थिक वर्षमा यस्तो आय ६.३ प्रतिशतले वृद्धि भएको थियो। गत आर्थिक वर्ष १ हजार ५३५ अमेरिकी डलर रहेको प्रतिव्यक्ति राष्ट्रिय आय चालु आर्थिक वर्षमा समेत सोही बराबर रहने अनुमान छ । गत आर्थिक वर्ष प्रतिव्यक्ति कुल खर्चयोग्य आय १ हजार ९९४ अमेरिकी डलर रहेकोमा चालु आर्थिक वर्ष २ हजार ४४ अमेरिकी डलर पुग्ने अनुमान छ ।
