काठमाडौँ। नेपाल स्टक एक्सचेन्ज (नेप्से) ले थप तीन ब्रोकर कम्पनीसहित ३१ ब्रोकर कम्पनीलाई मार्जिन कारोबार सञ्चालनका लागि अनुमति प्रदान गरेको छ। नयाँ स्वीकृति प्राप्त गर्ने कम्पनीहरूमा नबिल स्टक डिलर, एनआइएमबि स्टक मार्केट्स र हिमालयन सेक्युरिटिज रहेका छन्।
यी कम्पनीहरू थपिएसँगै मार्जिन कारोबार सेवा प्रदान गर्न योग्य ब्रोकर कम्पनीहरूको संख्या ३१ पुगेको छ। नेप्सेका अनुसार देशभर सञ्चालनमा रहेका ९२ ब्रोकर कम्पनीमध्ये हाल यी संस्थाले मात्र आवश्यक मापदण्ड पूरा गरी अनुमति प्राप्त गरेका हुन्।
नेपाल धितोपत्र बोर्ड (सेबोन) ले ‘मार्जिन कारोबार सुविधा सम्बन्धी निर्देशिका, २०८२’ लागु गर्दै गत फागुन १ गतेदेखि यो व्यवस्था कार्यान्वयनमा ल्याएको थियो। निर्देशिका अनुसार ब्रोकर कम्पनीहरूले निश्चित सर्त पुरा गरेपछि लगानीकर्तालाई धितोको आधारमा थप रकम उपलब्ध गराई सेयर खरिद गर्न सहयोग गर्न सक्छन्।
मार्जिन कारोबारलाई नेपाली पुँजी बजारमा तरलता बढाउने तथा लगानीकर्तालाई थप लगानी क्षमता प्रदान गर्ने व्यवस्थाका रूपमा हेरिएको छ। यद्यपि, यसमा ऋणको प्रयोग हुने र बजार घट्दा जोखिम पनि उच्च रहने भएकाले लगानीकर्ताले सेवा उपयोग गर्नुअघि सम्बन्धित सर्त र जोखिमबारे पर्याप्त जानकारी लिन आवश्यक हुन्छ।
